اسلام آباد: وزارت صحت نے انسدادِ پولیو کے لیے نئی حکمت عملی تیار کر لی ہے۔ کوآرڈینیٹر انسداد پولیو پروگرام کیپٹن (ر) انوار الحق نے سماء سے گفتگو میں بتایا کہ اب پانچ سال سے کم عمر بچوں کو حفاظتی قطروں کے ساتھ ساتھ پندرہ سال تک کے بچوں کو پولیو سے بچاؤ کے ٹیکے بھی لگائے جائیں گے۔
Wednesday, 24th September 2025
انوار الحق کے مطابق یہ فیصلہ انسداد پولیو ٹیکنیکل ایڈوائزری گروپ کی سفارش پر کیا گیا ہے اور اس مقصد کے لیے حفاظتی ٹیکوں کی مہم رواں سال نومبر میں شروع ہوگی۔ ابتدائی مرحلے میں یہ مہم کراچی، لاہور اور کوئٹہ میں چلائی جائے گی۔
انہوں نے مزید بتایا کہ مہم کے دوران کراچی میں 40 لاکھ اور لاہور میں 15 لاکھ بچوں کو حفاظتی ٹیکے لگائے جائیں گے۔ ان کا کہنا تھا کہ کراچی اور لاہور میں متعدد ویکسین مہمات کے باوجود پولیو وائرس مکمل طور پر ختم نہیں ہو سکا، اس لیے بچوں کے بڑے طبقے کو شامل کرنے کا فیصلہ کیا گیا ہے۔