کراچی (اسپورٹس ڈیسک) پاکستان کرکٹ بورڈ (پی سی بی) کے چیئرمین اور ایشین کرکٹ کونسل (اے سی سی) کے صدر محسن نقوی نے ایشیا کپ کے دوران بھارتی ٹیم کے رویے کو اسپورٹس مین شپ کے منافی قرار دیتے ہوئے مایوسی کا اظہار کیا ہے۔
ایم اے جناح روڈ دھماکہ: جاں بحق لیب مالک کی بیوہ کا 6 کروڑ 45 لاکھ ہرجانے کا دعویٰ
سماجی رابطے کی ویب سائٹ ’’ایکس‘‘ پر اپنے پیغام میں محسن نقوی نے کہا کہ کھیل میں سیاست کو گھسیٹنا افسوسناک ہے اور یہ کھیل کی اصل روح کے خلاف ہے۔ ان کا مزید کہنا تھا کہ امید ہے آئندہ میچز میں تمام ٹیمیں جیت کو خوش اسلوبی اور وقار کے ساتھ منائیں گی۔
واضح رہے کہ ایشیا کپ کے حالیہ میچ کے اختتام پر بھارتی ٹیم نے پاکستانی کھلاڑیوں سے ہاتھ نہیں ملایا اور نہ ہی اختتامی تقریب میں شریک ہوئی، جس پر قومی ٹیم کے مینیجر نوید اکرم چیمہ نے سخت احتجاج ریکارڈ کرایا۔
نوید اکرم چیمہ نے الزام عائد کیا کہ میچ ریفری نے بھی کپتانوں سے ٹاس کے دوران ہاتھ نہ ملانے کی درخواست کی تھی جو غیر مناسب رویہ تھا۔ انہوں نے کہا کہ بھارتی کھلاڑیوں کا ہاتھ نہ ملانا کھیل کی اسپرٹ کے خلاف اور قومی ٹیم کے لیے ایک چیلنج تھا۔
پاکستانی کپتان سلمان علی آغا نے بھارتی رویے کے خلاف بطور احتجاج اختتامی تقریب میں شرکت نہ کرنے کا فیصلہ کیا۔ ٹیم کے ہیڈ کوچ مائیک ہیسن نے بھی پاکستانی ردعمل کو فطری قرار دیا اور کہا کہ کھیل میں عزت، احترام اور ایمانداری بنیادی اہمیت رکھتے ہیں۔