نیو کراچی میں پولیس مقابلہ، ایک اسٹریٹ کرمنل زخمی حالت میں گرفتار، دو ساتھی دھر لیے گئے

کراچی (اسٹاف رپورٹر) تھانہ نیو کراچی انڈسٹریل ایریا پولیس اور اسٹریٹ کرمنلز کے درمیان لیاری ندی کنارے صدیق آباد قبرستان کے قریب مقابلہ ہوا۔ ترجمان ایس ایس پی ڈسٹرکٹ سینٹرل ذیشان شفیق صدیقی کے مطابق فائرنگ کے تبادلے میں ایک ملزم زخمی حالت میں گرفتار کیا گیا جبکہ دو دیگر ملزمان بغیر زخمی ہوئے پکڑے گئے۔

کراچی میں سی آئی اے پولیس کی بڑی کارروائی؛ آن لائن منشیات فروشی کا نیٹ ورک بے نقاب، ایک ملزم گرفتار

زخمی ملزم کی شناخت فہد ولد عبدالرحمن کے نام سے ہوئی ہے، جبکہ دیگر گرفتار ملزمان میں عیان ولد شہزاد اور زبیر ولد عبدالوحید شامل ہیں۔ پولیس نے ملزمان کے قبضے سے ایک 30 بور پستول بمعہ راؤنڈز اور زیر استعمال بلا نمبری موٹر سائیکل برآمد کرلی۔

زخمی ملزم کو فوری طور پر عباسی شہید اسپتال منتقل کیا گیا جبکہ دیگر دونوں ملزمان کو مزید قانونی کارروائی کے لیے تھانے منتقل کردیا گیا ہے۔ پولیس کے مطابق گرفتار ملزمان سے تفتیش جاری ہے تاکہ ان کے دیگر جرائم اور ساتھیوں کے بارے میں معلومات حاصل کی جاسکیں۔