کراچی (رپورٹر) فرانس کے قومی دن یومِ آزادی فرانس (بیسٹیل ڈے) کے موقع پر قونصل جنرل فرانس الیکسس شاٹانسکی کی میزبانی میں ایک پروقار تقریب کا انعقاد کراچی میں کیا گیا، جس میں پاکستان اور فرانس کے درمیان دیرینہ سفارتی، دفاعی، ثقافتی و معاشی تعلقات کو خراجِ تحسین پیش کیا گیا۔
تقریب میں گورنر سندھ کامران ٹیسوری، وزیراعلیٰ سندھ مراد علی شاہ، وزیر اطلاعات شرجیل میمن، وزیر بلدیات سعید غنی سمیت متعدد اعلیٰ سفارتکاروں، کاروباری شخصیات، ماہرینِ تعلیم اور ثقافت سے وابستہ افراد نے شرکت کی۔
اپنے خطاب میں قونصل جنرل الیکسس شاٹانسکی نے کہا کہ 14 جولائی صرف فرانس کا یومِ آزادی نہیں بلکہ مساوات، آزادی اور اخوت کی انقلابی اقدار کا دن ہے جو 1789ء کے بیسٹیل قلعہ پر حملے سے وجود میں آئیں۔ انہوں نے کہا کہ آج یہی پیغام دنیا بھر میں گونج رہا ہے، اور پاکستان میں اس دن کی تقریبات دونوں ممالک کے دوستانہ رشتے کی جھلک ہیں۔
انہوں نے کہا کہ فرانس 1947 میں پاکستان کو تسلیم کرنے والا پہلا غیر مسلم ملک تھا، اور دونوں ممالک کے درمیان دفاعی تعاون کی بنیاد تب ہی رکھ دی گئی تھی۔ پاکستان ایئرفورس کے فرانسیسی میرَاج طیارے، اور بحریہ کے آغوستا آبدوزیں اس شراکت کی تاریخی مثالیں ہیں۔
قونصل جنرل نے اقوامِ متحدہ کی حالیہ سمندری سربراہی کانفرنس (UNOC3) اور ون واٹر سمٹ میں پاکستان-فرانس اشتراک کا ذکر کرتے ہوئے کہا کہ موسمیاتی تبدیلی اور ماحولیاتی تحفظ کے شعبے میں بھی باہمی تعاون وسعت اختیار کر رہا ہے۔
انہوں نے بتایا کہ فرانسیسی کمپنیاں جیسے سی ایم اے سی جی ایم، شنائیڈر الیکٹرک، تھالس، لوریال اور پیجو پاکستان میں سرمایہ کاری کر رہی ہیں، جبکہ گل احمد، چوٹانی انڈسٹریز، مارٹن ڈاؤ جیسی پاکستانی کمپنیاں فرانس میں اپنی موجودگی بڑھا رہی ہیں۔
پاکستان-فرانس بزنس الائنس کی بحالی کا اعلان کرتے ہوئے، قونصل جنرل نے ہمایوں اخلاق (CEO, Schneider Electric) کی خدمات کو سراہا۔
تقریب میں تعلیم اور ثقافت کے شعبے پر بھی روشنی ڈالی گئی۔ فرانس گزشتہ 60 سالوں سے سندھ و بلوچستان میں آثارِ قدیمہ کی کھدائی میں پاکستان کا شریکِ سفر رہا ہے۔ انہوں نے آغا خان یونیورسٹی، آئی بی اے اور دیگر اداروں کے ساتھ فرانسیسی تعاون کو سراہا اور بتایا کہ الائنس فرانسیز کراچی پاکستان کا سب سے قدیم غیر ملکی ثقافتی ادارہ ہے۔
اب کراچی میں کمپس فرانس کا مستقل نمائندہ بھی موجود ہے تاکہ پاکستانی طلبا کو فرانس میں تعلیم کے مزید مواقع فراہم کیے جا سکیں۔
تقریب کے اختتام پر قونصل جنرل نے اپنے خطاب کا اختتام پرجوش الفاظ میں کیا:
"Vive la République, Vive la France – پاکستان زندہ باد”
