فٹبال کی تاریخ کے عظیم ترین کھلاڑیوں میں شمار ہونے والے کرسٹیانو رونالڈو کے بیٹے کرسٹیانو جونیئر نے اپنے والد کی شاندار میراث کو آگے بڑھاتے ہوئے پرتگال انڈر 15 فٹبال اسکواڈ میں پہلی بار جگہ حاصل کر لی ہے، جو ایک نئی نسل کے لیجنڈ کی شروعات کا اشارہ ہے۔
بھارتی جارحیت کا انجام سفید جھنڈے لہرا کر شکست تسلیم، پاک فوج کی جوابی کارروائیوں سے دشمن پسپا
14 سالہ کرسٹیانو جونیئر اس وقت سعودی عرب کے کلب النصر کی یوتھ اکیڈمی میں کھیل رہے ہیں اور وہ جلد ہی کروشیا میں منعقدہ انٹرنیشنل یوتھ ٹورنامنٹ میں پرتگال کی نمائندگی کریں گے، جہاں ان کا سامنا جاپان، یونان اور انگلینڈ سے ہوگا۔
رونالڈو نے اس موقع پر سوشل میڈیا پر خوشی کا اظہار کرتے ہوئے لکھا:
"تم پر فخر ہے بیٹا”
یہ پیغام ایک باپ کی خوشی اور ایک لیجنڈ کی توقعات دونوں کا عکاس ہے۔
باپ کے نقش قدم پر
کرسٹیانو جونیئر اپنے والد کے ساتھ دنیا کے کئی مشہور فٹبال کلبوں میں وقت گزار چکے ہیں۔ انہوں نے ریئل میڈرڈ، جووینٹس اور مانچسٹر یونائیٹڈ کی یوتھ ٹیموں میں بھی اپنی صلاحیتوں کا مظاہرہ کیا۔ اٹلی میں اپنے قیام کے دوران 58 گولز اسکور کرنے کی اطلاعات ہیں۔ اس کے علاوہ ان کے ‘سیو’ جشن کی نقل کرتے ویڈیوز بھی وائرل ہو چکی ہیں۔
بین الاقوامی مستقبل کی جھلک
رونالڈو جونیئر ریاستہائے متحدہ میں پیدا ہوئے، اسپین میں پلے بڑھے، اور اب سعودی عرب میں مقیم ہیں، جس کی وجہ سے وہ تین مختلف ممالک کے لیے کھیلنے کے اہل تھے۔ تاہم پرتگال کی جانب سے کال اپ اس بات کی علامت ہے کہ وہ اپنے والد کی راہ پر گامزن ہونے کا ارادہ رکھتے ہیں۔
رونالڈو نے 2022 میں ایک انٹرویو میں انکشاف کیا تھا:
"میرا بیٹا کہتا ہے: ابو، کچھ سال اور رک جائیں، میں آپ کے ساتھ کھیلنا چاہتا ہوں!”
اب یہ خواب حقیقت کے قریب محسوس ہونے لگا ہے۔
ایک نئی امید کی شروعات
جس ملک کی فٹبال شناخت گزشتہ دو دہائیوں سے رونالڈو کے گرد گھومتی ہے، وہاں کرسٹیانو جونیئر کی شمولیت صرف فٹبال کا تسلسل نہیں بلکہ ایک نسل کی منتقلی کا مظہر ہے۔ پرتگال کی نوجوان ٹیم میں ان کا داخلہ شاید نئے دور کی شروعات ہو، جہاں باپ کے بعد بیٹے کا نام بھی عالمی اسٹیج پر جگمگائے۔