کراچی: واٹر اینڈ سیوریج کارپوریشن کے چیف ایگزیکٹو آفیسر (سی ای او) احمد علی صدیقی نے جامعہ کراچی کا خصوصی دورہ کیا، جہاں انہوں نے پانی کی متاثرہ لائن کا تفصیلی معائنہ کیا۔ ان کے ہمراہ چیف انجینئر ڈبلیو ٹی ایم ظفر پلیجو بھی موجود تھے جنہوں نے جاری مرمتی کام کے حوالے سے مکمل بریفنگ دی۔
دورے کے دوران سی ای او واٹر کارپوریشن نے مرمتی کام کی رفتار، معیار، اور موجود سہولیات کا جائزہ لیا۔ انہوں نے متعلقہ افسران کو سختی سے ہدایت دی کہ مرمتی کام ہر صورت میں مقررہ وقت کے اندر مکمل کیا جائے تاکہ جامعہ کراچی کو پانی کی فراہمی جلد بحال ہو سکے۔ انہوں نے واضح کیا کہ اس اہم مرمتی عمل میں کسی بھی قسم کی تاخیر ہرگز برداشت نہیں کی جائے گی۔
انہوں نے یہ بھی کہا کہ مرمتی کام کی مسلسل نگرانی کی جائے گی تاکہ شہریوں کو جلد از جلد پانی کی فراہمی یقینی بنائی جا سکے۔ اس موقع پر چیف انجینئر ظفر پلیجو نے سی ای او کو یقین دہانی کرائی کہ تمام تر وسائل بروئے کار لاتے ہوئے مرمت کا عمل بروقت مکمل کر لیا جائے گا۔
ترجمان واٹر کارپوریشن کے مطابق، واٹر کارپوریشن کی ٹیم جامعہ کراچی میں پانی کی فراہمی کو بحال کرنے کے لیے دن رات سرگرم ہے اور اس مقصد کے لیے تمام دستیاب تکنیکی و انسانی وسائل کا بھرپور استعمال کیا جا رہا ہے۔
یہ اقدام اس بات کا مظہر ہے کہ شہری ضروریات کو ترجیحی بنیادوں پر حل کیا جا رہا ہے، اور جامعہ کراچی جیسے اہم تعلیمی ادارے کی بنیادی سہولتوں کو فوری بحال کرنے کی کوشش کی جا رہی ہے۔
