پاکستان اور بحرین کی عسکری قیادت کے درمیان موجودہ فوجی تعاون کو مزید وسعت اور گہرائی دینے پر اتفاق ہوا ہے۔
پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے بحرین نیشنل گارڈ کے کمانڈر سے ملاقات کی، جس میں خطے کی موجودہ صورتحال سمیت دوطرفہ دفاعی امور پر تفصیلی تبادلہ خیال کیا گیا۔
آئی ایس پی آر کے بیان کے مطابق ملاقات میں دونوں ممالک کے درمیان عسکری تعاون کو مزید مضبوط بنانے پر بھی اتفاق کیا گیا، جبکہ علاقائی سیکیورٹی چیلنجز پر بھی مشاورت کی گئی۔
بحرین نیشنل گارڈ کے کمانڈر نے پاکستانی مسلح افواج کی پیشہ ورانہ مہارت اور دہشت گردی کے خلاف قربانیوں کو خراج تحسین پیش کیا۔
آئی ایس پی آر کے مطابق، جوائنٹ اسٹاف ہیڈکوارٹرز آمد پر بحرینی کمانڈر کو تینوں مسلح افواج کے چاق و چوبند دستے نے گارڈ آف آنر پیش کیا، جس سے دونوں ممالک کے مابین گہرے عسکری تعلقات کی عکاسی ہوتی ہے۔
ترجمان پاک فوج کے مطابق دونوں جانب سے اس بات پر زور دیا گیا کہ خطے میں امن و استحکام کے لیے مشترکہ کوششوں کو جاری رکھا جائے گا۔