کراچی کے ایڈیشنل آئی جی جاوید عالم اوڈھو نے آل کراچی تاجر الائنس کے 32 رکنی وفد سے کراچی پولیس آفس میں ایک اہم ملاقات کی۔ اس ملاقات میں تاجر رہنما خواجہ جمال سیٹھی، حکیم شاہ، آصف گلفام، مرتضیٰ حسین، محمد اعظم، جنید قریشی اور دیگر اراکین نے شرکت کی۔
سیف علی خان کے خاندان کی تاریخی جائیدادوں پر حکومت کا قبضہ ممکن، پٹودی خاندان کو قانونی مشکلات کا سامنا
ملاقات کے دوران تاجران نے کراچی پولیس کی کارکردگی کی تعریف کی، خاص طور پر امن و امان کے قیام اور اسٹریٹ کرائم میں کمی کے لیے کیے گئے اقدامات کی ستائش کی۔ تاجران نے پولیس کی جانب سے شہریوں کے تحفظ اور مارکیٹوں میں امن برقرار رکھنے کی کوششوں کو سراہا۔
ایڈیشنل آئی جی کراچی نے تاجران کی شکایات اور تجاویز کو بغور سنا اور انہیں یقین دہانی کرائی کہ ان کے مسائل کو ترجیحی بنیادوں پر حل کیا جائے گا۔ انہوں نے کہا کہ تاجران اور پولیس کے درمیان مضبوط رابطے کے لیے تاجران پولیس رابطہ کمیٹی قائم کی جائے گی، جو تاجران کے مسائل کو فوری حل کرنے میں مددگار ثابت ہوگی۔
انہوں نے مزید کہا کہ مارکیٹوں میں شاہین فورس کی پیٹرولنگ میں اضافہ کیا جائے گا تاکہ اسٹریٹ کرائم میں واضح کمی لائی جا سکے اور تاجران اور عوام کا تحفظ یقینی بنایا جا سکے۔ اس کے علاوہ، پولیس چیف نے اسٹریٹ کرائم کی روک تھام میں CCTV کیمروں کی افادیت پر زور دیتے ہوئے کہا کہ مارکیٹوں اور ان کے اطراف میں کیمرے نصب کرنے سے جرائم میں واضح کمی آئے گی اور ملزمان کی فوری گرفتاری ممکن ہو سکے گی۔
ایڈیشنل آئی جی نے کہا کہ پولیس اور عوام کے درمیان باہمی تعاون سے ہی شہر میں پائیدار امن قائم کیا جا سکتا ہے۔
