تشکر نیوز: پاک بحریہ کے جہاز پی این ایس حنین نے رومانیہ سے پاکستان کی طرف اپنے پہلے سفر کے دوران سعودی عرب کے جدہ بندرگاہ کا دورہ کیا اور رائل سعودی نیول فورسز کے جہاز کے ساتھ مشترکہ بحری مشق میں حصہ لیا۔
جدہ پہنچنے پر، رائل سعودی نیول فورسز (RSNF) کے اعلیٰ حکام اور پاکستانی سفارتخانے کے عملے نے پی این ایس حنین کا استقبال کیا۔ بندرگاہ پر قیام کے دوران، پی این ایس حنین کے کمانڈنگ آفیسر نے رائل سعودی نیول فورسز ویسٹرن فلیٹ کے کمانڈر رئیر ایڈمرل منصور بن سعود الجیاد اور کمانڈر کنگ فیصل نیول بیس ریئر ایڈمرل صالح بن عبداللہ العمری سے ملاقات کی۔ ملاقات میں دونوں بحری افواج کے درمیان باہمی دلچسپی کے امور اور دوطرفہ تعاون پر گفتگو کی گئی۔
بعد ازاں، پی این ایس حنین نے رائل سعودی نیول فورسز کے جہاز ایچ ایم ایس الریاض کے ساتھ مشترکہ بحری مشق میں شرکت کی، جس میں مختلف مشترکہ میری ٹائم مشقوں اور آپریشنز کی ریہرسل کی گئی۔ مشق کا مقصد دونوں بحری افواج کے درمیان باہمی تعاون اور مشترکہ آپریشنز کی صلاحیت کو بڑھانا تھا۔
پی این ایس حنین کے سعودی عرب کے دورے نے دونوں ممالک کے مابین برادرانہ تعلقات اور دفاعی تعاون کو مزید مستحکم کیا ہے۔