نوجوان تاجر میر رضا کے قتل کیس کی تحقیقات کرنے والی مشترکہ تحقیقاتی ٹیم (جے آئی ٹی) نے عدالت سے رجوع کرلیا۔
جے آئی ٹی نے مشکوک افراد کو شاملِ تفتیش کرنے اور بینک اکاؤنٹس کی جانچ پڑتال کی اجازت مانگی ہے۔ اس حوالے سے جوڈیشل مجسٹریٹ شرقی کی عدالت میں درخواست دائر کردی گئی۔
عدالت نے درخواست پر متعلقہ فریقین کو نوٹس جاری کردیے۔
احمد بھاردے اور دیگر افراد کے اکاؤنٹس کی جانچ کی درخواست
ذرائع کے مطابق جے آئی ٹی احمد بھاردے، عبداللہ بھاردے اور میر رضا کے ساتھ منسلک رہنے والے دیگر افراد کے بینک اکاؤنٹس کی جانچ کرنا چاہتی ہے۔
درخواست میں عدالت سے استدعا کی گئی ہے کہ متعلقہ اداروں اور بینکوں کو تحقیقات میں تعاون کی ہدایت دی جائے۔ اس عمل کے ذریعے مشکوک افراد کے مالی معاملات کا جائزہ لیا جائے گا۔
درخواست میں کہا گیا ہے کہ تحقیقات مکمل ہونے کے بعد مقدمے کا چالان عدالت میں پیش کردیا جائے گا۔
میر رضا کی لاش 29 جولائی کو ملی تھی
واضح رہے کہ کراچی کے نوجوان تاجر میر رضا کی لاش رواں سال 29 جولائی کو گلستان جوہر سے ملی تھی۔
واقعے کے بعد قتل کی تحقیقات شروع کی گئی تھیں۔ جے آئی ٹی اب کیس کے سلسلے میں مشکوک افراد کے مالی معاملات کی جانچ کرنا چاہتی ہے۔