اسلام آباد: چیئرمین پاکستان تحریک انصاف بیرسٹر گوہر علی خان نے خیبرپختونخوا میں ایمرجنسی کے نفاذ کی شدید مذمت کی ہے۔
ایکس پر اپنے پیغام میں بیرسٹر گوہر نے کہا کہ پی ٹی آئی ایمرجنسی کے اقدام کو یکسر مسترد کرتی ہے۔ انہوں نے اسے تشویشناک، سنگین سیاسی غلطی اور غیر جمہوری اقدام قرار دیا۔
بیرسٹر گوہر کے مطابق عوام اپنے حقوق کے خلاف ایسے اقدامات قبول نہیں کریں گے۔
انہوں نے کہا کہ خیبرپختونخوا کے عوام کا مینڈیٹ ان کا آئینی اور قانونی حق ہے۔ اس مینڈیٹ کو نظر انداز کرکے صوبائی خودمختاری کمزور نہیں کی جاسکتی۔
چیئرمین پی ٹی آئی نے مزید کہا کہ وفاق اور صوبے کے درمیان تصادم پیدا کرکے نہ امن قائم کیا جاسکتا ہے اور نہ ہی استحکام لایا جاسکتا ہے۔