اسلام آباد: اپوزیشن اتحاد کے رہنماؤں نے جمعیت علمائے اسلام (ف) کے سربراہ مولانا فضل الرحمان سے ملاقات کی، جس میں سیاسی صورتحال اور پاکستان تحریک انصاف کے احتجاج پر تبادلہ خیال کیا گیا۔
علامہ راجا ناصر عباس اور اسد قیصر نے مولانا فضل الرحمان سے ان کی رہائش گاہ پر ملاقات کی۔ ملاقات میں مولانا عبدالغفور حیدری، مولانا لطف الرحمان، محمد اسلم غوری، سینیٹر کامران مرتضیٰ اور اخونزادہ حسین بھی شریک ہوئے۔
ملاقات کے بعد اپوزیشن اتحاد اور مولانا فضل الرحمان نے مشترکہ پریس کانفرنس کی۔
آل پارٹیز کانفرنس بلانے کی تجویز
مولانا فضل الرحمان نے کہا کہ موجودہ سیاسی صورتحال میں مختلف تجاویز سامنے آئی ہیں۔ ان کے مطابق جمہوری قوتیں مذاکرات پر یقین رکھتی ہیں۔
انہوں نے کہا کہ حکومت کے رویے نے آئندہ مذاکرات کی گنجائش نہیں چھوڑی۔ تاہم ایسے مذاکرات ہونے چاہئیں جن میں تمام فریق کچھ لیں اور کچھ دیں۔
مولانا فضل الرحمان نے کہا کہ آل پارٹیز کانفرنس بلانے کی تجویز سامنے آئی ہے۔ اس معاملے پر اپنی جماعت اور اپوزیشن اتحاد سے مشاورت کی جائے گی۔
ان کے مطابق اے پی سی میں مہنگائی، خطے کی صورتحال، کشمیر اور سیاسی قیدیوں کی رہائی سمیت اہم معاملات زیر بحث لائے جاسکتے ہیں۔
پی ٹی آئی کے احتجاج پر مولانا کا مؤقف
مولانا فضل الرحمان نے کہا کہ سیاسی صورتحال میں میانہ روی لانے کے لیے ایسا ایجنڈا تیار ہونا چاہیے جو ملک کے مسائل کے حل میں مدد دے۔
انہوں نے کہا کہ پی ٹی آئی اگر اسلام آباد آنا چاہتی ہے تو اس کے راستے میں رکاوٹیں نہیں ڈالنی چاہئیں، کیونکہ احتجاج کرنا اس کا آئینی حق ہے۔
عزیز آباد بلاک ٹو کی فیکٹری میں آتشزدگی، واٹر کارپوریشن کا فائر بریگیڈ کو بلا تعطل پانی فراہم کرنے کا فیصلہ
اے پی سی کے لیے سیاسی جماعتوں سے رابطے
اپوزیشن لیڈر سینیٹ علامہ راجا ناصر عباس نے کہا کہ حکومت کے ساتھ ہونے والے مذاکرات کی تفصیلات مولانا فضل الرحمان کے سامنے رکھی گئی ہیں۔
انہوں نے بتایا کہ آل پارٹیز کانفرنس کے لیے مختلف سیاسی جماعتوں سے رابطے کیے جارہے ہیں۔
راجا ناصر عباس کے مطابق اے پی سی کا ایجنڈا تمام جماعتوں کی مشاورت سے تیار کیا جائے گا اور اس میں ملک کو درپیش مسائل شامل ہوں گے۔
سلمان اکرم راجہ کا مؤقف
پی ٹی آئی کے سیکریٹری جنرل سلمان اکرم راجہ نے کہا کہ بنیادی اصولوں پر سیاسی جماعتوں کے درمیان اختلاف نہیں ہونا چاہیے۔
انہوں نے کہا کہ مذاکرات کے ذریعے راستہ نکالنے کی کوشش کی گئی اور یہ آخری کوشش نہیں تھی۔
سلمان اکرم راجہ کے مطابق مجوزہ اے پی سی میں عوامی مسائل اور سیاسی معاملات کو سامنے رکھا جائے گا۔
