کراچی: مہاجر قومی موومنٹ پاکستان کے چیئرمین آفاق احمد نے کہا ہے کہ وہ جنوبی سندھ صوبے کے قیام کے مطالبے پر آج بھی قائم ہیں۔
شاہ فیصل ٹاؤن میں خواتین کنونشن سے خطاب کرتے ہوئے انہوں نے کہا کہ ماضی میں بھی اس مطالبے کے لیے تحریک چلائی گئی تھی۔
آفاق احمد کے مطابق جنوبی سندھ صوبے کے لیے دستخطی مہم بھی چلائی گئی۔ انہوں نے کہا کہ ملک کی تقدیر کا فیصلہ چند خاندان نہیں بلکہ عوام کریں گے۔
صاف اور شفاف انتخابات کا مطالبہ
آفاق احمد نے کہا کہ سیاسی تجربات کا سلسلہ اب ختم ہونا چاہیے۔
انہوں نے کہا کہ پانی، صحت، تعلیم اور روزگار کی سہولتیں عوام کی بنیادی ضروریات ہیں۔
ان کے مطابق ایسا حکمران ہونا چاہیے جو عوام کو جوابدہ ہو۔ انہوں نے احتساب کے حق کو بھی عوام سے جوڑا۔
آفاق احمد نے ملک میں صاف اور شفاف انتخابات کو وقت کی ضرورت قرار دیا۔
انہوں نے کہا کہ جب عوام کو اپنے ووٹ کی اہمیت پر یقین ہوگا تو انتخابی ٹرن آؤٹ میں اضافہ ہوسکتا ہے۔
نورستان جھڑپیں: پاکستان نے افغان طالبان کے الزامات مسترد کردیے
کراچی کے مسائل پر اظہار تشویش
آفاق احمد نے کراچی میں اسٹریٹ کرائم اور ڈمپر حادثات کے واقعات پر بھی بات کی۔
انہوں نے کہا کہ ڈکیتی کے دوران شہری قتل ہوتے ہیں۔ ڈمپر حادثات میں بھی قیمتی جانیں ضائع ہورہی ہیں۔
انہوں نے ذمہ داروں کو سزائیں ملنے کے حوالے سے سوالات اٹھائے۔ پکا قلعہ واقعے میں ہلاکتوں کا بھی ذکر کیا۔
مہاجر حقوق اور بلدیاتی اختیارات
مہاجر قومی موومنٹ کے چیئرمین نے محصورین مشرقی پاکستان کو وطن واپس لانے کا مطالبہ کیا۔
انہوں نے کہا کہ مہاجر برادری کو روزگار سمیت تمام شعبوں میں جائز حقوق ملنے چاہئیں۔
آفاق احمد نے سندھ حکومت کی بعض پالیسیوں اور بلدیاتی قوانین میں ترامیم پر بھی تنقید کی۔
انہوں نے کراچی کے منتخب بلدیاتی نمائندوں کو مکمل اختیارات دینے کا مطالبہ کیا۔
خواتین کی سیاسی شرکت پر زور
آفاق احمد نے خواتین کی سیاسی شرکت اور حقوق پر بھی بات کی۔
انہوں نے خواتین کے خلاف تفریق، ناانصافی اور گھریلو تشدد کے خاتمے پر زور دیا۔
ان کے مطابق تعلیم اور سرکاری ملازمتوں میں خواتین کو آبادی کے تناسب سے جائز حصہ ملنا چاہیے۔
انہوں نے خواتین کی فعال سیاسی شرکت کو بھی اہم قرار دیا۔