منگھوپیر پولیو مہم: انکاری بچوں کی ویکسی نیشن پر خصوصی توجہ

کراچی: کمشنر کراچی سید حسن نقوی نے منگھوپیر کا دورہ کرکے جاری انسداد پولیو مہم کا جائزہ لیا۔

انہوں نے کہا کہ مہم کے دوران انکاری اور رہ جانے والے بچوں کی ویکسی نیشن پر خصوصی توجہ دی جارہی ہے۔

کمشنر کراچی کے مطابق انکاری بچوں کی ویکسی نیشن مکمل کرنے کے لیے بلدیاتی نمائندوں کی مدد لینے کا فیصلہ کیا گیا ہے۔

یو سی چیئرمینز اور کونسلرز والدین سے رابطہ کرکے انکاری بچوں کی ویکسی نیشن مکمل کرائیں گے۔ بلدیاتی نمائندوں کو انکاری اور رہ جانے والے بچوں کی مکمل فہرستیں بھی فراہم کردی گئی ہیں۔

منگھوپیر میں تین زونز قائم

منگھوپیر ٹاؤن میں پولیو مہم کی ٹیموں کو تین زونز میں تقسیم کیا گیا ہے۔ علاقے میں گھر گھر پولیو ویکسی نیشن کا عمل جاری ہے۔

یو سی 14 اور ملحقہ وارڈز کے کونسلرز کو 83 بچوں کی ویکسی نیشن کا ہدف دیا گیا ہے۔

گزشتہ چھ پولیو مہمات سے انکاری 45 بچوں پر بھی خصوصی توجہ دی جارہی ہے۔

وائٹ گارمنٹس زون کے نمائندوں کو 207 انکاری بچوں کی ویکسی نیشن مکمل کرنے کا ہدف دیا گیا ہے۔

عباس ٹاؤن اور دیگر وارڈز میں 143 بچوں میں سے 46 سے زائد بچوں کی ویکسی نیشن مکمل ہوچکی ہے۔ باقی بچوں کے گھروں پر کمیونٹی موبلائزرز روزانہ دورے کررہے ہیں۔

چوکنڈی لوڈشیڈنگ: شہریوں کا کے الیکٹرک دفتر کے باہر احتجاج

والدین کے تحفظات دور کرنے کی کوشش

کمشنر کراچی نے کہا کہ کمیونٹی کے بزرگوں اور مقامی بااثر افراد کی مدد سے والدین کے تحفظات دور کیے جائیں گے۔

علماء کرام اور مذہبی رہنماؤں سے بھی پولیو مہم میں تعاون حاصل کیا جارہا ہے۔ مساجد کے ذریعے پولیو کے قطرے پلانے کی اہمیت سے متعلق شعور اجاگر کیا جائے گا۔

پولیو کے خاتمے کے لیے مشترکہ کوششیں

سید حسن نقوی نے کہا کہ پولیو کے خاتمے کے لیے ضلعی انتظامیہ، محکمہ صحت اور عالمی شراکت دار مشترکہ کوششیں کررہے ہیں۔

ان کے مطابق کراچی کے 12 ماحولیاتی نمونوں میں سے 9 کے نتائج منفی آئے ہیں۔ باقی نمونوں کو بھی منفی کرنے کے لیے کوششیں جاری ہیں۔

کمشنر کراچی نے کہا کہ کراچی کو پاکستان میں پولیو وائرس کے پھیلاؤ کا اہم مرکز سمجھا جاتا ہے۔ اس لیے منگھوپیر میں پولیو ویکسی نیشن کی مکمل کوریج انتہائی اہم ہے۔

انہوں نے آئندہ 4 سے 5 روز میں انکاری اور رہ جانے والے تمام بچوں کی ویکسی نیشن مکمل کرنے کے عزم کا اظہار کیا۔