کراچی: خواجہ آصف کا بیان سندھ کے سینئر وزیر شرجیل انعام میمن کے لیے باعثِ تشویش بن گیا ہے۔ انہوں نے وفاقی حکومت سے وضاحت طلب کی ہے۔
شرجیل میمن نے کہا کہ حکومت واضح کرے کہ وزیر دفاع خواجہ آصف کا بیان سرکاری پالیسی ہے یا ان کی ذاتی رائے۔ انہوں نے خواجہ آصف کے بیان کو مایوس کن قرار دیا۔
خواجہ آصف کے بیان پر ردعمل
شرجیل میمن نے کہا کہ وفاقی وزرا کی جانب سے سندھ کے خلاف بیان بازی سیاسی جارحیت کے مترادف ہے۔
ان کے مطابق خواجہ آصف کو سندھ اور پیپلز پارٹی پر تنقید سے پہلے تاریخ، آئین اور پارلیمانی ریکارڈ کا مطالعہ کرنا چاہیے۔
خواجہ آصف نے ایک بیان میں پیپلز پارٹی کی صوبوں سے متعلق پالیسی پر سوال اٹھایا تھا۔ انہوں نے کہا تھا کہ پیپلز پارٹی پنجاب میں سرائیکی صوبے کی حمایت کرتی ہے، جبکہ مزید انتظامی یونٹس کی بات پر سندھودیش کا نعرہ سامنے آتا ہے۔
پیپلز پارٹی کا مؤقف
شرجیل میمن نے کہا کہ پیپلز پارٹی کا مؤقف دو رخی نہیں بلکہ واضح اور آئینی ہے۔
انہوں نے کہا کہ پنجاب اسمبلی سرائیکی صوبے کے حق میں دو مرتبہ قرارداد منظور کر چکی ہے۔ ان کے مطابق سندھ اسمبلی بھی صوبے میں مزید صوبے بنانے کے خلاف آٹھ قراردادیں منظور کر چکی ہے۔
شرجیل میمن نے کہا کہ پیپلز پارٹی نے ہمیشہ وفاق کو مضبوط بنانے اور آئین کی بالادستی کی سیاست کی ہے۔
گل پلازہ کیس: چالان عدالت میں جمع، تنویر پاستا مرکزی ملزم قرار
مسلم لیگ ن کو شرجیل میمن کا پیغام
سندھ کے سینئر وزیر نے کہا کہ مسلم لیگ ن اپنے اتحادیوں کو خوش کرے، لیکن سندھ کو سیاسی طور پر قربانی کا بکرا بنانے سے گریز کرے۔
انہوں نے کہا کہ پیپلز پارٹی جمہوری نظام کو مستحکم کرنے کے لیے اپنا کردار جاری رکھے گی۔
شرجیل میمن کے مطابق پاکستان کے وفاق اور جمہوری نظام کو مضبوط بنانا پیپلز پارٹی کی سیاست کا بنیادی حصہ ہے