رواں مون سون سیزن میں کراچی میں بارشیں نہ ہونے کے برابر رہیں۔ اندرون سندھ میں بھی معمول سے کم بارش ریکارڈ ہوئی۔ محکمہ موسمیات نے اب ستمبر سے نومبر تک بارشوں کی پیشگوئی جاری کردی ہے۔
سندھ میں خشک موسم کا امکان
موسمیاتی ماڈلز کے مطابق سندھ میں آئندہ تین ماہ خشک موسم غالب رہ سکتا ہے۔ محکمہ موسمیات نے ستمبر، اکتوبر اور نومبر میں معمول سے کم بارشوں کی پیشگوئی کی ہے۔
جنوب مشرقی سندھ میں بھی بارشیں معمول سے کم رہنے کا امکان ہے۔ کراچی سمیت صوبے کے بیشتر علاقوں میں بارش کے امکانات محدود رہیں گے۔
بعض علاقوں میں بارش کی مزید کمی
محکمہ موسمیات کے مطابق سندھ کے بعض علاقوں میں تین ماہ کے دوران بارشوں میں مزید کمی متوقع ہے۔ اس صورتحال کے باعث خشک موسم برقرار رہنے کا امکان ہے۔
دیگر علاقوں میں زیادہ بارش کی پیشگوئی
محکمہ موسمیات نے بالائی پنجاب، کشمیر اور خیبر پختونخوا میں معمول سے زیادہ بارشوں کی پیشگوئی کی ہے۔
موسمیاتی ماڈلز کے مطابق ایل نینو اور انڈین اوشن ڈائی پول کے اثرات بھی برقرار رہنے کا امکان ہے۔
