راولپنڈی: چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے پاکستان آرڈیننس فیکٹری (پی او ایف) واہ کا دورہ کیا، جہاں انہوں نے مقامی طور پر تیار کیے گئے جدید اسلحے اور گولہ بارود کے ٹیسٹ و ٹرائلز کا مشاہدہ کیا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے پاکستان کے سب سے بڑے دفاعی صنعتی کمپلیکس کا دورہ کیا۔ انہیں پی او ایف کی پیداواری صلاحیت، برآمدات کے امکانات اور ملکی دفاعی صنعتی بنیاد میں ادارے کے کردار پر بریفنگ دی گئی۔
اس موقع پر انہیں پی او ایف کے مختلف شعبوں، آپریشنز اور مقامی سطح پر جدید عسکری سازوسامان کی تیاری سے متعلق تفصیلات سے آگاہ کیا گیا۔ آرمی چیف نے مقامی طور پر ڈیزائن اور تیار کیے گئے اسلحے اور گولہ بارود کے ٹیسٹ و ٹرائلز بھی دیکھے۔
آئی ایس پی آر کے مطابق فیلڈ مارشل عاصم منیر کو ادارے میں جاری جدت، خود انحصاری اور دفاعی پیداواری صلاحیت میں اضافے کے اقدامات پر بھی بریفنگ دی گئی۔
انہیں ڈی آئی پی آر اے آرڈیننس کے نفاذ کے بعد پی او ایف کی کارپوریٹائزیشن میں ہونے والی پیش رفت سے بھی آگاہ کیا گیا۔ بریفنگ میں مقامی پیداوار اور صنعتی صلاحیت بڑھانے کے لیے جاری منصوبوں کا جائزہ بھی لیا گیا۔
فیلڈ مارشل عاصم منیر کو بتایا گیا کہ پی او ایف میں دو نئے صنعتی پلانٹس کی تنصیب جاری ہے اور ان سے رواں سال کے اختتام تک پیداوار شروع ہونے کی توقع ہے۔
آئی ایس پی آر کے مطابق دورے کے دوران پاکستان کے دفاعی شعبے میں خود انحصاری، مقامی پیداوار اور تکنیکی جدت کے فروغ کے عزم کا اعادہ کیا گیا۔
