پاکستان صومالیہ دفاعی تعاون کے فروغ پر زور دیتے ہوئے صومالیہ کے اعلیٰ سطحی وفد نے جنرل ہیڈ کوارٹرز (جی ایچ کیو) کا دورہ کیا، جہاں وفد نے چیف آف ڈیفنس فورسز فیلڈ مارشل سید عاصم منیر سے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق صومالیہ کے وزیر دفاع کی قیادت میں آنے والے وفد نے جی ایچ کیو میں اہم ملاقات کی، جس میں باہمی دلچسپی کے امور، علاقائی سلامتی کی صورتحال اور دفاعی تعاون سے متعلق معاملات پر تبادلہ خیال کیا گیا۔
ملاقات کے دوران پاکستان اور صومالیہ کے درمیان دفاعی و سکیورٹی تعاون کو مزید وسعت دینے، عسکری تعلقات مضبوط بنانے اور سکیورٹی چیلنجز سے نمٹنے کی استعداد کار بہتر بنانے کے اقدامات پر بھی گفتگو ہوئی۔
آئی ایس پی آر کے مطابق دونوں فریقین نے دفاعی شعبے میں تعاون بڑھانے اور خطے میں امن و استحکام کے لیے مشترکہ کوششوں کی اہمیت پر زور دیا۔
صومالی وزیر دفاع نے پاکستان کی مسلسل حمایت کو سراہتے ہوئے خطے میں امن و استحکام کے لیے پاک فوج کے پیشہ ورانہ کردار کی تعریف کی۔
اس موقع پر فیلڈ مارشل سید عاصم منیر نے صومالیہ کے سکیورٹی نظام کو مضبوط بنانے اور خطے میں دیرپا امن کے قیام کے لیے پاکستان کے تعاون کے عزم کا اعادہ کیا۔