چہلم سیکیورٹی: ڈی آئی جی ایسٹ کی زیرِ صدارت اہم اجلاس، فول پروف انتظامات کا فیصلہ

کراچی: چہلم سیکیورٹی کے انتظامات کا جائزہ لینے کے لیے ڈی آئی جی ایسٹ ڈاکٹر فرخ علی کی زیرِ صدارت اہم اجلاس منعقد ہوا۔

اجلاس میں پولیس، سندھ رینجرز، سول انتظامیہ، دیگر متعلقہ اداروں، مجالس و جلوسوں کے منتظمین اور اسکاوٹس انجمن کے نمائندوں نے شرکت کی۔

اجلاس میں مجالس، جلوسوں، سبیلوں اور ٹریفک مینجمنٹ کے انتظامات پر تفصیلی غور کیا گیا۔

شرکاء نے جلوس کے روٹس، حساس مقامات، پارکنگ اور انٹری و ایگزٹ پوائنٹس کا بھی جائزہ لیا۔

لیڈی سرچرز کی تعیناتی، بم ڈسپوزل یونٹ کی سرچنگ اور عزاداروں کو فراہم کی جانے والی سہولیات پر بھی تبادلۂ خیال کیا گیا۔

علماء کرام، ذاکرین اور عزاداری کے منتظمین نے ضلعی انتظامیہ اور پولیس سے مکمل تعاون کی یقین دہانی کرائی۔

شرکاء نے کہا کہ مرکزی جلوس مقررہ وقت، طے شدہ راستے اور ضابطہ کار کے مطابق پرامن انداز میں اختتام پذیر ہوگا۔

انہوں نے واضح کیا کہ صرف منظور شدہ مجالس، جلوسوں اور سبیلوں کی اجازت دی جائے گی۔

شرکاء نے محرم الحرام کے دوران امن و امان برقرار رکھنے کے لیے پولیس کے اقدامات کو سراہا۔

انہوں نے اپنے علاقوں اور امام بارگاہوں سے متعلق تجاویز بھی پیش کیں۔

ڈی آئی جی ایسٹ نے متعلقہ افسران کو ان مسائل کے حل کے لیے ضروری ہدایات جاری کیں۔

ڈی آئی جی ایسٹ ڈاکٹر فرخ علی نے کہا کہ مرکزی جلوس کے لیے جامع سیکیورٹی پلان تیار کیا جائے گا۔

انہوں نے کہا کہ تمام مجالس اور جلوسوں کی سیکیورٹی کو مزید مؤثر بنایا جائے گا۔

انہوں نے بتایا کہ اضافی پولیس نفری اور لیڈی سرچرز بھی تعینات کی جائیں گی۔

ڈی آئی جی ایسٹ نے کہا کہ شہدائے کربلا کی قربانی صبر، برداشت، بھائی چارے اور امن کا درس دیتی ہے۔

انہوں نے کہا کہ تمام مکاتبِ فکر مذہبی ہم آہنگی کی بہترین مثال قائم کرتے آئے ہیں۔

انہوں نے واضح کیا کہ کسی بھی شرپسند عنصر کو امن خراب کرنے کی اجازت نہیں دی جائے گی۔

اجلاس کے اختتام پر ملکی سلامتی، امن اور استحکام کے لیے خصوصی دعا کی گئی۔