کارگو طیارہ حادثے کی تحقیقات کے لیے اسلام آباد سے تحقیقاتی ٹیم بلوچستان کے ساحلی علاقے پہنچ گئی۔ ٹیم نے طیارے کے مینٹیننس ریکارڈ اور حادثے سے متعلق شواہد کا جائزہ لیا۔
تحقیقاتی ٹیم نے سمندر سے برآمد ہونے والے ملبے کا معائنہ کیا۔ اس دوران ریسکیو اہلکاروں نے طیارے کا مزید ملبہ بھی سمندر سے نکال لیا۔
حکام کے مطابق طیارے کا بلیک باکس تاحال نہیں ملا۔ اس کی تلاش کے لیے سرچ آپریشن مسلسل جاری ہے۔
حادثے میں لاپتا ہونے والے عملے کے پانچ ارکان کی تلاش بھی جاری ہے۔ متعلقہ ادارے سمندر اور ساحلی علاقوں میں سرچ آپریشن کر رہے ہیں۔
یاد رہے کہ نجی کارگو کمپنی کا طیارہ شارجہ سے کراچی آ رہا تھا۔ طیارہ منگل کی شب بلوچستان کے ساحل کے قریب حادثے کا شکار ہو گیا۔
حکام کے مطابق طیارے میں عملے کے پانچ افراد سوار تھے۔ حادثے کی وجوہات جاننے کے لیے تحقیقات جاری ہیں۔
