بلوچستان دہشت گردی کے حوالے سے وزیراعظم شہباز شریف نے کہا ہے کہ حکومت اور سیکیورٹی ادارے دہشت گردی کے مکمل خاتمے کے لیے پُرعزم ہیں اور آخری دہشت گرد کے خاتمے تک کارروائیاں جاری رکھی جائیں گی۔
کوئٹہ میں نیشنل ایکشن پلان کی صوبائی ایپکس کمیٹی کے اجلاس کی صدارت کرتے ہوئے وزیراعظم نے کہا کہ گزشتہ چار روز کے دوران بلوچستان میں پیش آنے والے دہشت گرد حملوں میں شہریوں اور سیکیورٹی اہلکاروں سمیت 42 افراد شہید ہوئے، جبکہ سیکیورٹی فورسز نے کارروائیوں کے دوران 54 دہشت گردوں کو ہلاک کیا۔
وزیراعظم نے کہا کہ بلوچستان میں دہشت گردی میں "مشرقی ہمسائے” کے ملوث ہونے کا دعویٰ کرتے ہوئے الزام عائد کیا کہ وہ دہشت گردوں کو مالی وسائل اور اسلحہ فراہم کر رہا ہے۔ انہوں نے مزید کہا کہ دہشت گرد افغانستان کی سرزمین پر پناہ لیے ہوئے ہیں، جبکہ بعض دیگر بیرونی عناصر بھی سرگرم ہیں، تاہم ان کے بارے میں مزید تفصیلات بیان نہیں کیں۔
انہوں نے کہا کہ دہشت گردی کے خلاف سیاسی اور عسکری قیادت ایک صفحے پر ہے اور ریاست اس چیلنج سے نمٹنے کے لیے تمام دستیاب وسائل استعمال کرے گی۔ ان کے بقول دہشت گردی کا مکمل خاتمہ حکومت کی اولین ترجیح ہے اور اس مقصد کے حصول تک کارروائیاں بلا تعطل جاری رہیں گی۔
شہباز شریف نے کہا کہ پاکستان کی سفارتی کامیابیاں بعض عناصر کو قبول نہیں، تاہم ملک ترقی اور خوشحالی کی جانب گامزن ہے اور شہداء کی قربانیاں رائیگاں نہیں جائیں گی۔
اجلاس میں فیلڈ مارشل سید عاصم منیر، گورنر بلوچستان جعفر خان مندوخیل، وزیراعلیٰ بلوچستان میر سرفراز بگٹی، قانون نافذ کرنے والے اداروں کے سربراہان، وفاقی وزراء احد خان چیمہ، عطاء اللہ تارڑ اور وزیراعظم کے مشیر رانا ثناء اللہ نے شرکت کی۔
وزیراعظم ایک روزہ دورے پر کوئٹہ پہنچے تھے، جہاں گورنر بلوچستان، وزیراعلیٰ اور سول و عسکری حکام نے ان کا استقبال کیا۔
