کراچی: فری میڈیکل کیمپ کے تحت کراچی پولیس نے گارڈن ہیڈ کوارٹر ساؤتھ میں پولیس ملازمین اور ان کے اہلخانہ کے لیے مفت طبی سہولیات فراہم کیں، جہاں ماہر ڈاکٹروں نے طبی معائنہ کیا اور مختلف تشخیصی ٹیسٹ بھی انجام دیے۔
یہ فری میڈیکل کیمپ ایڈیشنل آئی جی کراچی آزاد خان کی ہدایت پر ویلفیئر برانچ کراچی پولیس نے یونائیٹڈ ہسپتال کے تعاون سے منعقد کیا۔ کیمپ کا مقصد پولیس افسران، جوانوں اور ان کے اہلخانہ کو معیاری طبی سہولیات تک آسان رسائی فراہم کرنا تھا۔
کیمپ کے دوران شرکاء کا مفت طبی معائنہ کیا گیا، جبکہ کارڈیالوجسٹ سے مشاورت، ای سی جی، سی بی سی اور آر بی ایس سمیت مختلف تشخیصی ٹیسٹ بھی بلا معاوضہ کیے گئے۔ اس اقدام سے پولیس ملازمین نے بڑی تعداد میں فائدہ اٹھایا۔
ڈی آئی جی ساؤتھ اسد رضا، ایس پی ہیڈ کوارٹر اور دیگر سینئر پولیس افسران نے میڈیکل کیمپ کا دورہ کیا۔ انہوں نے انتظامات کا جائزہ لیا اور یونائیٹڈ ہسپتال کے نمائندوں سے ملاقات کرکے طبی سہولیات کی فراہمی کے مختلف پہلوؤں پر تبادلۂ خیال بھی کیا۔
کراچی پولیس کا کہنا ہے کہ پولیس اہلکاروں اور ان کے اہلخانہ کی صحت اور فلاح کو ترجیح دینا ادارے کی ویلفیئر پالیسی کا اہم حصہ ہے، جبکہ ایسے اقدامات مستقبل میں بھی جاری رکھے جائیں گے۔
