اسلام آباد: ملک میں پیٹرولیم مصنوعات کی قیمتوں میں نمایاں کمی کا امکان ظاہر کیا جا رہا ہے۔ سرکاری ذرائع کے مطابق 20 جون سے پیٹرولیم مصنوعات کی قیمتوں میں 55 روپے فی لیٹر سے زائد کمی کی تجویز زیر غور ہے۔
پیٹرولیم ڈویژن، پی ایس او اور اوگرا کی جانب سے تیار کردہ ورکنگ پیپر میں مختلف آپشنز پر غور کیا گیا ہے، جس کے تحت عالمی منڈی میں تیل کی قیمتوں اور داخلی مالیاتی ایڈجسٹمنٹ کو مدنظر رکھتے ہوئے عوام کو ریلیف دینے کی سفارش کی گئی ہے۔
ذرائع کا کہنا ہے کہ وزیراعظم نے حالیہ سطح پر پیٹرولیم قیمتوں میں اضافے پر عدم اطمینان کا اظہار کرتے ہوئے متعلقہ حکام کو ہدایت دی ہے کہ 7 مارچ کو کیے گئے اضافے کے اثرات کا ازالہ کیا جائے۔ اس کے بعد حکومت میں قیمتوں میں ممکنہ کمی کے حوالے سے مشاورت کا عمل تیز ہو گیا ہے۔
اگر مجوزہ کمی منظور ہو جاتی ہے تو یہ حالیہ عرصے میں پیٹرولیم مصنوعات میں سب سے بڑی کمیوں میں سے ایک ہو سکتی ہے، جس سے عام صارفین اور ٹرانسپورٹ سیکٹر پر نمایاں اثر پڑنے کی توقع ہے۔
تاہم حکومتی سطح پر حتمی اعلان اوگرا کی سفارشات اور وزارت خزانہ کی منظوری کے بعد کیا جائے گا۔