تشکُّر نیوز رپورٹنگ،
خادم حرمین شریفین شاہ سلمان بن عبد العزیز کی خصوصی ہدایت پر مکہ اور مدینہ سمیت سعودی عرب کے مختلف شہروں میں بارش کیلئے نماز استسقا پڑھی گئی۔
بین الاقوامی خبر رساں ادارے کی رپورٹ کے مطابق دو روز قبل سعودی رائل کورٹ کی جانب سے جاری بیان میں مملکت میں بارش کیلئے قوم سے نماز استسقا ادا کرنے کی اپیل کی گئی تھی۔
سعودی رائل کورٹ کے بیان کے مطابق بارش جیسی رحمت کے حصول کے لیے نماز استسقا سنت نبوی صلی اللہ علیہ وآلہ وسلم ہے۔
خادم حرمین شریفین کی جانب سے قوم سے درخواست کی گئی تھی کہ نماز استسقا میں اللہ سے توبہ استغفار کرتے ہوئے بارش کی دعا کریں گے جب کہ اس بیان میں عوام سے خیرات کرنے اور اچھے کاموں کی بھی اپیل کی گئی۔
رپورٹس کے مطابق سعودی فرماں روا کی ہدایت پر مملکت کے مختلف حصوں میں نماز استسقا صبح 7 بجے کے بعد ادا کی گئی تھی۔
