تشکُّر نیوز رپورٹنگ،
ایک انٹرویو کے دوران بالی ووڈ کی معروف اداکارہ پرینیتی چوپڑا نے کہا ہے کہ ’’میں نے اداکاری کے بعد اب دوسرے پروفیشن کا آغاز بطور گلوکارہ کیا ہے اور اس پروفیشن میں میرے شوہر راگھو چڈھا نے بہت ساتھ دیا‘‘۔
اپنے شوہر کا تذکرہ کرتے ہوئے مزید کہا کہ راگھو گلوکاری کے حوالے سے میری روزانہ حوصلہ افزائی کرتے ہیں، ایک عوامی شخصیت ہونے کی وجہ سے انہیں میرے شوق کا اندازہ تھا اسی لیے انہوں نے کہا کہ مجھے یہ کرنا چاہیے، اس سے کافی حوصلہ ملا۔
پرینیتی چوپڑا نے کہا کہ میرے شوہر میرے ریڑھ کی ہڈی کی مانند ہیں، وہ میری گلوکاری کے جذبے اور جنون سے بخوبی واقف ہیں، اس لیے اب میری کوشش ہے کہ پلے بیک سنگنگ کی جانب قدم بڑھاؤ۔
واضح رہے کہ پرینیتی نے حال ہی میں اسٹیج پرفارمنس کے حوالے سے اپنے ڈیبیو کا آغاز ممبئی میوزک فیسٹول میں کیا۔
یاد رہے کہ پرینیتی چوپڑا بچپن میں موسیقی کے مقابلوں میں شریک ہوا کرتی تھیں، جبکہ کم لوگوں کو یہ معلوم ہوگا کہ وہ لڑکپن میں ڈی ڈی چینل کے لائیو شوز میں گایا کرتی تھیں۔