ایس بی سی اے کے ڈپٹی ڈائریکٹر ریاض مُلا کے خلاف سنگین الزامات — وزیرِاعلیٰ سندھ کی خاموشی پر سوالات

ایسوسی ایشن آف بلڈرز اینڈ ڈیولپرز آف پاکستان (ABAD) کے چیئرمین محمد حسن بخشی نے وزیرِاعلیٰ سندھ سید مراد علی شاہ کو ایک اہم خط لکھ کر سندھ بلڈنگ کنٹرول اتھارٹی (SBCA) کے ڈپٹی ڈائریکٹر ڈسٹرکٹ ویسٹ ریاض حسین مُلا کے خلاف سنگین الزامات عائد کیے ہیں، مگر ابھی تک سندھ حکومت کی جانب سے کوئی کارروائی نہ ہونے پر شدید سوالات جنم لے رہے ہیں۔

سی ٹی ڈی سندھ کی جانب سے آئی جی سندھ غلام نبی میمن کے اعزاز میں فیئر ویِل عشائیہ

حکام کی مبینہ پشت پناہی — کارروائی کیوں نہیں ہو رہی؟

ذرائع کے مطابق ریاض مُلا کو ڈی جی ایس بی سی اے مظمل حسین کی مکمل پشت پناہی حاصل ہے، جس کے باعث نہ تو اب تک افسر کو معطل کیا گیا ہے اور نہ ہی باضابطہ انکوائری کا آغاز ہو سکا ہے۔

افسر کی مبینہ سرپرستی نے پورے معاملے کو مزید مشکوک بنا دیا ہے اور یہ تاثر گہرا ہو رہا ہے کہ سندھ حکومت دانستہ طور پر معاملے کو نظرانداز کر رہی ہے۔

ABAD کا خط — بلیک میلنگ، غیر قانونی مطالبات اور ہراسانی کے الزامات

4 دسمبر 2025 کو لکھے گئے ABAD کے خط میں کہا گیا ہے کہ:

•ڈپٹی ڈائریکٹر ریاض مُلا مبینہ طور پر بلڈرز سے بلیک میلنگ اور غیر قانونی مطالبات کرتے رہے ہیں۔

•متعدد بلڈرز نے تحریری شکایات میں الزام لگایا کہ افسر گالی گلوچ اور ہراسانی کے واقعات میں بھی ملوث ہے۔

•ان اقدامات کے باعث بلڈنگ اور کنسٹریکشن سیکٹر بری طرح متاثر ہو رہا ہے اور سندھ حکومت کی ساکھ کو شدید نقصان پہنچ رہا ہے۔

ABAD نے مطالبہ کیا ہے کہ فوری، شفاف اور غیر جانب دارانہ انکوائری کے احکامات جاری کیے جائیں اور معاملہ مکمل ہونے تک ریاض مُلا کو معطل کیا جائے تاکہ وہ تحقیقات پر اثرانداز نہ ہو سکیں۔

ڈسٹرکٹ ویسٹ میں مبینہ طور پر کروڑوں روپے کا “سسٹم” چلنے کے انکشافات

ذرائع کے مطابق ریاض مُلا گزشتہ آٹھ برس سے زائد عرصہ سے ضلع غربی اور اورنگی ٹاؤن میں تعینات ہیں اور اسی دوران پورے علاقے میں:

•غیر قانونی تعمیرات،

•بال رومز،

•بینکوئٹ ہالز اور

•پیٹرول پمپس

کی تعمیرات مبینہ طور پر اُن کی سرپرستی میں جاری رہیں۔

باخبر ذرائع کا کہنا ہے کہ ڈسٹرکٹ ویسٹ میں ماہانہ کروڑوں روپے کا مبینہ بھتہ سسٹم چلایا جاتا ہے، جس سے نہ صرف غیر قانونی تعمیرات جاری رہتی ہیں بلکہ پورا علاقہ ایک منظم نیٹ ورک کے زیرِ اثر سمجھا جاتا ہے۔

کیا وزیراعلیٰ سندھ کارروائی کریں گے؟

سندھ کے سیاسی اور حکومتی حلقوں میں یہ سوال شدت سے اٹھایا جا رہا ہے کہ:

•سی ایم سندھ مراد علی شاہ

•صوبائی وزیرِ بلدیات ناصر حسین شاہ

•اور ڈی جی ایس بی سی اے مظمل حسین

آخر کیوں اس معاملے پر خاموش تماشائی بنے ہوئے ہیں؟

ABAD کی جانب سے باقاعدہ شکایات درج کرائے جانے کے بعد بھی کوئی کارروائی نہ ہونا حکومت کی گورننس اور احتساب کے دعوؤں پر بڑا سوالیہ نشان ہے۔

صورتحال سنگین، بلڈرز شدت سے پریشان

بلڈرز کمیونٹی کا کہنا ہے کہ ریاض مُلا کے خلاف سنگین ثبوت موجود ہونے کے باوجود اس کی پوزیشن برقرار رکھنا اس امر کی نشاندہی کرتا ہے کہ غیر قانونی تعمیرات کا پورا نظام مضبوط تحفظ میں ہے۔