...

غزہ: اسرائیلی حملے میں زخمی 24 سالہ کراٹے چیمپئن دم توڑ گئی

ویب ڈیسک،

غزہ میں جاری اسرائیلی حملوں میں زخمی ہونے والی 24 سالہ کراٹے چیمپئن نغم ابو سمرہ دم توڑ گئی۔

عرب میڈیا کے مطابق نغم ابو سمرہ 17 دسمبر کو اسرائیلی فضائی حملے میں زخمی ہوئی تھی جس میں اس کی ایک ٹانگ ضائع ہوگئی تھی اور اس کے بعد سے وہ کوما میں تھی۔

رپورٹس کے مطابق اس حملے کے بعد خاتون کراٹے چیمپئن کو مصر منتقل کرنے کی بھی اجازت نہیں ملی تھی اواس حملے میں اس کی بہن بھی جاں بحق ہوگئی تھی، نغم کی موت اسرائیل اور حماس کی تباہ کن جنگ کے 100ویں دن ہوئی۔

گزشتہ ماہ اسپتال سے اپنی بیٹی کی حالت پر بات کرتے ہوئے نغم  کے والد  مروان عبداللہ نے  اسکائی نیوز سے گفتگو میں کہا تھا کہ میں برباد ہو گیا ہوں، نغم میری زندگی ہے، اسے کچھ ہوگیا تو میں کیا کروں گا۔

نغم کی بہن اور والدہ بھی دنیا سے رخصت ہوچکی ہیں

انہوں نے کہا کہ نغم کی بہن کی موت بھی اس جنگ میں ہوئی، 7 اکتوبر یعنی جنگ کے شروع ہونے سے ایک ہفتہ قبل نغم کی والدہ کی کینسر سے موت ہوگئی، اس مشکل وقت میں صرف نغم ہی میری واحد امید ہے۔

مروان عبداللہ نے بتایا کہ ان کی بیٹی کا خواب ہے کہ نوجوان لڑکیوں میں کراٹے سیکھنے کا شوق پیدا ہوسکے، جنگ نے میری بیٹی کے تمام خوابوں پر پانی پھیر دیا، سب برباد کردیا، میرا واحد خواب ہے کہ بیٹی کی آواز دوبارہ سُن سکوں۔

خیال رہے کہ 7 اکتوبر سے اب تک غزہ میں جاری اسرائیلی بمباری سے شہید فلسطینیوں کی تعداد 24 ہزار سے تجاوز کرچکی ہے جب کہ 60 ہزار 317 سے زائد افراد زخمی ہو چکے ہیں۔

اسرائیلی جارحیت سے شہید اور زخمی ہونے والے فلسطینیوں میں نصف سے زائد تعداد صرف بچوں اور خواتین پر مشتمل ہے۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Don`t copy text!
Seraphinite AcceleratorOptimized by Seraphinite Accelerator
Turns on site high speed to be attractive for people and search engines.