کراچی: لیاقت نیشنل میڈیکل کالج (LNMC) کے دسویں کانووکیشن کی پُروقار تقریب لیاقت نیشنل اسپتال کے کنونشن سینٹر میں منعقد ہوئی، جس میں 103 ایم بی بی ایس گریجویٹس کو ڈگریاں تفویض کی گئیں۔ جناح سندھ میڈیکل یونیورسٹی (JSMU) کے رجسٹرار ڈاکٹر محمد اعظم خان نے طلبہ سے حلف لیا جبکہ وائس چانسلر ڈاکٹر امجد سراج میمن نے ڈگریاں عطا کیں۔
تقریب میں نمایاں کارکردگی پر ڈاکٹر مریم کو پہلی، ڈاکٹر ملائیکہ علی کو دوسری، اور ڈاکٹر علینہ امین محمد کو تیسری پوزیشن پر سراہا گیا، جبکہ ڈاکٹر منال ارشد ملک کو پانچ سالہ تعلیمی کارکردگی پر "واجد علی شاہ میڈل برائے بہترین طالبہ (کلاس آف 2024)” سے نوازا گیا۔
پرنسپل پروفیسر ڈاکٹر کریم اللہ مکی نے اپنے استقبالیہ خطاب میں طلبہ اور والدین کو مبارکباد دیتے ہوئے LNMC کے تعلیمی معیار کو سراہا۔ انہوں نے بتایا کہ کالج سے اب تک 1200 سے زائد طلبہ فارغ التحصیل ہو چکے ہیں جو اندرون و بیرون ملک خدمات انجام دے رہے ہیں۔ LNMC کو بین الاقوامی اداروں کی جانب سے تسلیم شدہ حیثیت حاصل ہے اور یہ "VSLO” پروگرام کے تحت بین الاقوامی طلبہ کو سیکھنے کے مواقع فراہم کرتا ہے۔
میڈیکل ڈائریکٹر ڈاکٹر سلمان فریدی نے نوجوان ڈاکٹروں کو مشورہ دیا کہ وہ خدمت کو مقدم رکھیں، اخلاقیات اور دیانت داری کو اپنے پیشے کا حصہ بنائیں۔ وائس چانسلر JSMU ڈاکٹر امجد سراج میمن نے LNMC کی تعلیمی ترقی پر خوشی کا اظہار کرتے ہوئے طلبہ کو مبارکباد دی اور ان کے اساتذہ کی محنت کو سراہا۔
تقریب علم، خدمت اور قیادت کے عہد کی تجدید کا موقع ثابت ہوئی، جہاں مستقبل کے معالجین نے انسانی خدمت کے عظیم سفر کا آغاز کیا۔
