کراچی (رپورٹر) ایف آئی اے امیگریشن نے کراچی ایئرپورٹ پر مستعد کارروائی کرتے ہوئے جعلی ای ویزے کے ذریعے البانیا جانے کی کوشش ناکام بنادی۔ ترجمان ایف آئی اے کے مطابق مشکوک دستاویزات کی جانچ کے دوران عملے نے مرزا سکندر نامی مسافر کو روکا، جس نے پیش کردہ ای ویزا جعلی نکلا۔
ابتدائی تفتیش کے دوران انکشاف ہوا کہ مذکورہ مسافر نے یہ جعلی ویزا ایجنٹوں سے 22 لاکھ روپے میں خریدا، جس میں سے 15 لاکھ روپے بینک کے ذریعے ادا کیے گئے۔ مسافر کی نشاندہی پر ایف آئی اے نے فوری کارروائی کرتے ہوئے دو ایجنٹوں، مہران خالد اور شہروز جنید، کو کراچی ایئرپورٹ سے گرفتار کر لیا۔
گرفتار افراد کو مزید تفتیش کے لیے ایف آئی اے اینٹی ہیومن ٹریفکنگ سرکل کراچی کے حوالے کر دیا گیا ہے، جہاں ان کے خلاف قانونی کارروائی جاری ہے۔