چیلسی فٹبال کلب نے یوئیفا کانفرنس لیگ کے فائنل میں جگہ بنا لی ہے، جہاں ان کا مقابلہ 28 مئی کو پولینڈ کے شہر وروسلاف میں ہسپانوی کلب ریال بیتیس سے ہوگا۔ جمعرات کی شب، چیلسی نے سیمی فائنل کے دوسرے مرحلے میں سویڈش کلب جورگارڈن کو 0-1 سے شکست دے کر مجموعی طور پر 1-5 سے برتری حاصل کی۔
ٹوٹنہم کی یورپی تاریخ میں نئی امید بوڈوگلمٹ کو شکست دے کر 17 سالہ ٹرافی کا خواب پھر سے زندہ
اس جیت میں کیرنن ڈیوسبری-ہال نے اہم کردار ادا کیا، جنہوں نے پہلے ہاف میں شاندار گول کر کے فتح کی بنیاد رکھی۔ اس میچ میں 16 سالہ ریگی والش نے چیلسی کی جانب سے یورپی مقابلے میں کھیلنے والے سب سے کم عمر کھلاڑی ہونے کا اعزاز حاصل کیا۔
چیلسی کے کوچ اینزو ماریسکا نے میچ کے بعد کہا، "ہم بہت خوش ہیں۔ کام مکمل ہو چکا ہے، اور اب ہمارے پاس فائنل کی تیاری کے لیے تقریباً 20 دن ہیں۔ امید ہے ہم ٹرافی جیت کر تاریخ رقم کریں گے۔”
اگر چیلسی یہ ٹورنامنٹ جیت جاتا ہے تو وہ یورپی مقابلوں کی تاریخ میں چیمپئنز لیگ، یورپا لیگ، اور کانفرنس لیگ تینوں جیتنے والا پہلا کلب بن جائے گا۔ بلیوز نے آخری بار 2021 میں چیمپئنز لیگ جیتی تھی، اور اس کے بعد یہ ان کی پہلی بڑی ٹرافی ہو گی۔
کپتان ریس جیمز کا کہنا تھا، "ہم ایک اور فائنل میں پہنچ چکے ہیں، اور ہمارا مقصد صرف کھیلنا نہیں بلکہ جیتنا ہے۔ ٹیم بہتر ہو رہی ہے، ہم درست سمت میں بڑھ رہے ہیں۔”
چیلسی کے اسٹرٹیجک فیصلوں پر تنقید کے باوجود، ٹیم اب پریمیئر لیگ میں بھی پانچویں پوزیشن پر ہے اور چیمپئنز لیگ کے لیے کوالیفائی کرنے کی پوزیشن میں آ چکی ہے۔ اس جیت میں ماریسکا کی طرف سے کئی اہم کھلاڑیوں کو آرام دیا گیا تاکہ اتوار کو نیوکاسل کے خلاف میچ کے لیے تازہ دم رکھا جا سکے۔
ریال بیتیس، جنہوں نے فیورینٹینا کو سخت مقابلے کے بعد مجموعی طور پر 3-4 سے شکست دی، پہلی بار کسی یورپی فائنل میں پہنچے ہیں۔ فیورینٹینا نے ہاف ٹائم سے پہلے 2-1 کی برتری حاصل کی، لیکن مانچسٹر یونائیٹڈ سے معاریت پر آئے اینٹونی نے اضافی وقت میں فیصلہ کن گول کر کے بیتیس کو فائنل میں پہنچا دیا۔
چیلسی کو اب موقع ہے کہ وہ ایک مشکل دور کے بعد نئی قیادت میں پہلا بڑا اعزاز حاصل کرے، اور ریال بیتیس کے خلاف فائنل میں وہ فیورٹ کے طور پر میدان میں اتریں گے۔