راولپنڈی: خصوصی کور کمانڈرز کانفرنس میں آرمی چیف جنرل عاصم منیر نے تمام محاذوں پر چوکنا رہنے اور فعال تیاریوں کی اہمیت پر زور دیتے ہوئے پاک بھارت کشیدگی اور علاقائی سلامتی کی صورت حال کا تفصیلی جائزہ لیا۔
وزیر بلدیات سندھ سعید غنی کا آئیپیکس ایکسپو 2023 کی افتتاحی تقریب سے خطاب
آرمی چیف کی صدارت میں ہونے والی اس کانفرنس میں پاکستان کی مسلح افواج کی پیشہ ورانہ مہارت، ثابت قدم حوصلے اور آپریشنل تیاریوں کو سراہا گیا۔ فورم نے پاکستان کی خود مختاری اور علاقائی سالمیت کو برقرار رکھنے کے اپنے عزم کا اعادہ کیا، اور کہا کہ کسی بھی جارحیت یا مہم جوئی کا جواب دینے کے لیے پاکستان کی مسلح افواج ہر وقت تیار ہیں۔
کانفرنس میں پاک بھارت کشیدگی خاص طور پر زیر غور آئی، اور بھارت کی طرف سے مقبوضہ جموں و کشمیر میں ہونے والے مظالم پر شدید تشویش کا اظہار کیا گیا۔ اس موقع پر آرمی چیف نے کہا کہ بھارتی افواج نے پہلگام واقعے کے بعد لائن آف کنٹرول کے قریب معصوم شہریوں کو مسلسل نشانہ بنایا ہے، جس سے علاقائی کشیدگی میں مزید اضافہ ہوا ہے۔ فورم کا کہنا تھا کہ بھارتی فوج کی غیر انسانی اور بلا اشتعال کارروائیاں علاقے میں امن کے لیے خطرہ بن سکتی ہیں، اور ان کا مناسب جواب دیا جائے گا۔
آرمی چیف نے تمام افسران کو ہدایت دی کہ وہ چوکنا رہیں اور فعال تیاریوں کو یقینی بنائیں تاکہ کسی بھی ممکنہ خطرے کا فوری اور مؤثر جواب دیا جا سکے۔ علاوہ ازیں، کانفرنس میں بھارت کے سیاسی اور فوجی مقاصد کے لیے خود ساختہ بحرانوں کے استعمال پر بھی تشویش کا اظہار کیا گیا، اور بھارت کی جانب سے اسٹیٹس کو تبدیل کرنے کی یک طرفہ کوششوں کی مذمت کی گئی۔
آرمی چیف نے کہا کہ پاکستان کی مسلح افواج ملک کی سرحدوں کی حفاظت اور علاقائی سالمیت کے لیے ہر لمحے تیار ہیں، اور ہم اپنے عزم میں بے پناہ ثابت قدم ہیں۔