اسلام آباد (تشکر نیوز: نائب وزیراعظم اور وزیر خارجہ اسحاق ڈار نے کہا ہے کہ پاکستان جنگ میں پہل نہیں کرے گا، لیکن اگر بھارت نے کسی قسم کی مہم جوئی یا اشتعال انگیزی کی کوشش کی تو ہمارا جواب بھرپور اور سخت ہوگا۔ ان خیالات کا اظہار انہوں نے ڈی جی آئی ایس پی آر لیفٹیننٹ جنرل احمد شریف چوہدری کے ہمراہ ایک اہم مشترکہ پریس کانفرنس میں کیا۔
یوم مزدور پر پیپلز پارٹی کا جلسہ: ٹریڈ یونینز کی بحالی اور مزدور حقوق کے تحفظ کا مطالبہ
اسحاق ڈار نے کہا کہ پہلگام واقعہ کے بعد بھارت کی جانب سے غیر ذمہ دارانہ الزامات اور رویے نے خطے کی صورتحال کو مزید پیچیدہ بنا دیا ہے۔ انہوں نے واضح کیا کہ پاکستان نے ہمیشہ دہشت گردی کی مذمت کی ہے اور اس کے خلاف سب سے زیادہ قربانیاں دی ہیں۔ پہلگام واقعے میں جاں بحق افراد کے ساتھ اظہار ہمدردی کرتے ہوئے انہوں نے کہا کہ معصوم شہریوں کا قتل ناقابل برداشت ہے، اور قرآن کے مطابق ایک انسان کا قتل پوری انسانیت کے قتل کے مترادف ہے۔
انہوں نے الزام عائد کیا کہ بھارت پاکستان سمیت دیگر ممالک میں دہشت گردی کو فروغ دے رہا ہے، اور مقبوضہ کشمیر میں انسانی حقوق کی سنگین خلاف ورزیاں جاری ہیں۔ اسحاق ڈار نے کہا کہ بھارت کا مقصد مقبوضہ کشمیر کی تحریک آزادی کو دہشت گردی سے جوڑنا ہے تاکہ دنیا کی توجہ ہٹائی جا سکے۔ انہوں نے خبردار کیا کہ اگر بھارت نے پانی روکنے کی کوشش کی تو اسے جنگ تصور کیا جائے گا، کیونکہ پانی پاکستانی عوام کی زندگی کی لائن ہے۔
ڈی جی آئی ایس پی آر لیفٹیننٹ جنرل احمد شریف چوہدری نے بھی پریس کانفرنس میں بھارتی رویے کو آڑے ہاتھوں لیا۔ انہوں نے کہا کہ بھارت ایک دہشت گرد ریاست ہے جو اپنے سیاسی مفادات کے لیے دہشت گردی جیسے واقعات کو استعمال کرتا ہے۔ انہوں نے پہلگام واقعہ پر سوالات اٹھاتے ہوئے کہا کہ واقعے کے صرف دس منٹ بعد ایف آئی آر کا اندراج، اور اس میں ’ہینڈلر‘ جیسے الفاظ کا استعمال، بھارتی بیانیے کی حقیقت پر شکوک پیدا کرتا ہے۔
ڈی جی آئی ایس پی آر نے کہا کہ واقعہ لائن آف کنٹرول سے 230 کلومیٹر دور پیش آیا، اور اتنے کم وقت میں واقعہ کی تصدیق، ایف آئی آر کا اندراج اور الزامات کا تعین ممکن نہیں۔ انہوں نے بھارتی میڈیا کی فوری الزام تراشی کو تنقید کا نشانہ بناتے ہوئے کہا کہ اس واقعے کو مذہب سے جوڑ کر مسلمانوں کو نشانہ بنایا جا رہا ہے۔
لیفٹیننٹ جنرل احمد شریف نے خبردار کیا کہ بھارت میں قید پاکستانیوں کو جعلی مقابلوں میں مارا جا سکتا ہے، اور بھارت پاکستان کے اندر دہشت گردی کے لیے اپنے آلہ کار متحرک کر چکا ہے۔ انہوں نے کہا کہ پاکستان کے پاس بھارت کی دہشت گردانہ سرگرمیوں کے ناقابل تردید شواہد موجود ہیں، اور بلوچستان سمیت کئی علاقوں میں بھارتی مداخلت کے ثبوت عالمی برادری کے سامنے رکھے جا چکے ہیں۔
پریس کانفرنس میں ترجمان دفتر خارجہ نے بھی گفتگو کرتے ہوئے کہا کہ پہلگام واقعے کے فوراً بعد جو طریقہ کار اپنایا گیا، وہ اسے مشکوک بناتا ہے، اور عالمی برادری کو اس کی غیر جانبدارانہ تحقیقات پر زور دینا چاہیے۔
وزیر اعظم شہباز شریف کی جانب سے بھی واقعے کی شفاف تحقیقات کی پیشکش کی گئی ہے تاکہ حقائق سامنے آئیں اور بھارت کی الزام تراشی کی سیاست کو بے نقاب کیا جا سکے۔