وزیر اعظم شہباز شریف اور نائب وزیر اعظم اسحٰق ڈار نے چین، برطانیہ اور ایران کے رہنماؤں سے الگ الگ ٹیلی فونک گفتگو میں بھارت کے ’بے بنیاد پروپیگنڈے‘ اور ’یکطرفہ اقدامات‘ پر شدید تشویش کا اظہار کیا، جن میں سندھ طاس معاہدے کو مؤخر کرنے کا بھارتی فیصلہ بھی شامل ہے۔ انہوں نے عالمی برادری کو آگاہ کیا کہ یہ اقدامات بین الاقوامی ذمہ داریوں کی صریح خلاف ورزی ہیں۔
ٹرمپ کی دوسری مدت میں امریکہ اور عالمی نظام پر غیر یقینی صورتحال کا سایہ دوست نالاں، مخالفین پرجوش
چینی وزیر خارجہ وانگ ژی نے گفتگو میں پاکستان کے سیکیورٹی خدشات کو جائز قرار دیتے ہوئے مکمل حمایت کی یقین دہانی کرائی۔ انہوں نے کہا کہ چین، بحیثیت آہنی دوست اور ہر موسم میں شراکت دار، پاکستان کی خودمختاری اور سلامتی کے تحفظ میں اس کا ساتھ دے گا۔ وانگ ژی نے زور دیا کہ خطے میں کشیدگی کسی کے مفاد میں نہیں اور تمام فریقین کو تحمل کا مظاہرہ کرنا چاہیے۔
دوسری جانب، برطانوی وزیر خارجہ ڈیوڈ لیمی سے گفتگو میں اسحٰق ڈار نے بھارتی اقدامات پر تشویش ظاہر کی۔ ڈیوڈ لیمی نے مسائل کے پرامن حل کی اہمیت پر زور دیا جبکہ پاکستان نے آزادانہ اور شفاف تحقیقات میں حصہ لینے کی پیشکش کی۔ دونوں ممالک نے خطے کی بدلتی صورتحال پر قریبی رابطے میں رہنے پر اتفاق کیا۔
اسی تناظر میں، وزیر دفاع خواجہ آصف نے میڈیا سے گفتگو کرتے ہوئے بھارت پر الزام عائد کیا کہ وہ سیاسی مقاصد کے لیے ڈرامہ رچا رہا ہے۔ انہوں نے پہلگام واقعے کی تحقیقات کے لیے بین الاقوامی کمیشن تشکیل دینے کا مطالبہ کیا، جس میں چین، روس، ایران اور عرب ممالک کو شامل کیا جائے۔
وزیر اعظم شہباز شریف نے ایرانی صدر مسعود پیزکیان سے بھی رابطہ کیا اور بھارت کے اشتعال انگیز اقدامات سے آگاہ کیا۔ انہوں نے واضح کیا کہ پاکستان خطے میں امن کا خواہاں ہے اور پانی کو بطور ہتھیار استعمال کرنے کی ہر کوشش کی مخالفت کرے گا۔ وزیراعظم نے بندر عباس دھماکے پر ایران کے عوام سے یکجہتی کا اظہار کرتے ہوئے ہر ممکن امداد کی پیشکش کی۔
ذرائع کے مطابق وزیر اعظم نے اپنے بھائی نواز شریف سے بھی ملاقات کر کے تازہ ترین صورتحال پر مشاورت کی، تاہم اس ملاقات کی کوئی باضابطہ تصدیق جاری نہیں کی گئی۔