کراچی: پاکستان سنی تحریک کے مرکزی صدر انجینئر محمد ثروت اعجاز قادری نے کراچی کے حالات پر صحافیوں سے گفتگو کرتے ہوئے شہر میں بڑھتے ہوئے مافیا کے راج اور حکومت کی عدم کارکردگی پر سخت تنقید کی۔ ان کا کہنا تھا کہ کراچی میں مختلف مافیاز کا راج ہے، جن میں پانی مافیا، ڈمپر مافیا، بھتہ مافیا اور غیر قانونی تعمیرات مافیا شامل ہیں، اور ہر دن شہریوں کو ایک نئی مافیا کا سامنا کرنا پڑتا ہے۔
پاک بحریہ کے بیڑے میں چوتھے آف شور پیٹرول ویسل پی این ایس یمامہ کی شمولیت
صحافی کے سوال کے جواب میں ثروت اعجاز قادری نے کہا کہ کراچی میں کوئی بھی قانون پر عمل درآمد نہیں کر رہا۔ ہر شخص اپنی طاقت اور وسائل کا استعمال کر کے قانون کے شکنجے سے بچنے میں کامیاب ہو جاتا ہے۔ شہر میں قانون صرف غریب اور سفید پوش افراد کے لیے ہے، باقی سب چہیتوں کی فہرست میں شامل ہیں۔ انہوں نے مزید کہا کہ شہر کی سڑکوں پر چلنے والی ہیوی ٹرانسپورٹ کے مالکان کے نزدیک سڑکوں پر چلنے والے دوسرے لوگ صرف "کیڑے مکوڑے” ہیں۔ ہیوی ٹرانسپورٹ کے ٹرک شہریوں کو کچل کر جا رہے ہیں اور اس کے باوجود کوئی کارروائی نہیں کی جا رہی۔
ثروت اعجاز قادری نے کہا کہ جب زیادتیوں کا سلسلہ بڑھتا ہے، تو پھر شہریوں میں بھی قانون کو اپنے ہاتھ میں لینے کا رجحان پیدا ہوتا ہے۔ انہوں نے کراچی کی موجودہ لاء اینڈ آرڈر کی صورتحال کو انتہائی خراب قرار دیا اور حکومت وقت سے مطالبہ کیا کہ وہ شہریوں کے حقوق کا تحفظ کرے اور انہیں سیکیورٹی فراہم کرے۔
ان کا کہنا تھا کہ کراچی کی سڑکوں پر چلتے ہوئے اتنا خوف محسوس ہوتا ہے جتنا کہ جنگل میں بھی نہیں ہوتا۔ شہری ہر وقت خوف میں مبتلا ہیں کہ وہ شام کو گھر واپس پہنچ پائیں گے یا نہیں۔ انہوں نے سوال اٹھایا کہ اچانک شہر میں ٹریفک حادثات میں اتنا اضافہ کیوں ہو گیا ہے، اور یہ سوال حکومت سے پوچھنا ضروری ہے۔ انہوں نے کہا کہ کوئی بھی محکمہ اپنے کام کو ذمہ داری سے نہیں کر رہا۔ حکومت کے نمائندے اور وزراء حادثات کے بعد صرف بیان بازی کرتے ہیں اور سمجھتے ہیں کہ ان کا فرض پورا ہو گیا ہے۔
ثروت اعجاز قادری نے سندھ حکومت کی جانب سے ہیوی ٹرانسپورٹ کے لیے ٹائم شیڈول جاری کیے جانے کا ذکر کیا اور سوال کیا کہ اس شیڈول پر عمل درآمد کیوں نہیں ہو رہا؟ انہوں نے کہا کہ اس شہر میں رہنے والوں کا کیا قصور ہے؟ وہ اپنے دکھ درد کس سے شیئر کریں؟ عوام کی محرومیوں کا ازالہ کون کرے گا؟