راولپنڈی: انسداد منشیات فورس (اے این ایف) نے ملک کے مختلف شہروں میں منشیات اسمگلنگ کے خلاف بھرپور کارروائیاں کرتے ہوئے 8 آپریشنز کے دوران 9 ملزمان کو گرفتار کر لیا ہے۔ کارروائیوں کے دوران مجموعی طور پر 2670 کلوگرام منشیات برآمد کی گئی، جس کی مالیت عالمی منڈی میں تقریباً 64 کروڑ 96 لاکھ روپے سے زائد بتائی جا رہی ہے۔
ڈائریکٹر جنرل ایف آئی اے رفعت مختار نے عہدے کا باقاعدہ چارج سنبھال لیا
اسلام آباد انٹرنیشنل ایئرپورٹ پر اے این ایف نے ڈنمارک جانے والی ایک خاتون کے ٹرالی بیگ سے 6.570 کلوگرام مشکوک مواد برآمد کیا۔ پشاور میں ایک کوریئر آفس کے ذریعے وہاڑی بھیجے جانے والے پارسل سے 1.010 کلوگرام آئس پکڑی گئی۔
بلوچستان کے علاقے نوکنڈی، چاغی سے سب سے بڑی کارروائی میں 2616.4 کلوگرام افیون برآمد ہوئی۔ اسلام آباد کے کاک پل ایکسپریس وے پر ایک ٹرک سے 24 کلوگرام چرس برآمد کی گئی اور ایک ملزم کو موقع پر گرفتار کیا گیا۔
صوابی میں کرنل شیر خان انٹرچینج کے قریب ایک گاڑی سے 15.6 کلوگرام چرس اور 2.4 کلوگرام افیون پکڑی گئی، جبکہ اس کارروائی میں 2 ملزمان گرفتار ہوئے۔
سیالکوٹ کے چائنہ چوک کے قریب 2 موٹر سائیکل سواروں کے قبضے سے 2 کلوگرام ہیروئن برآمد کی گئی۔ گوجرانوالہ میں ایک چیک پوسٹ پر کارروائی کے دوران ایک خاتون سے 1.8 کلوگرام چرس پکڑی گئی۔
لاہور کے مغل پورہ انڈر پاس کے قریب ایک خاتون اور موٹر سائیکل سوار کے قبضے سے 480 گرام ہیروئن برآمد کی گئی۔
تمام گرفتار ملزمان کے خلاف انسداد منشیات ایکٹ کے تحت مقدمات درج کر لیے گئے ہیں اور تحقیقات کا آغاز کر دیا گیا ہے۔ اے این ایف کا کہنا ہے کہ منشیات کے خلاف زیرو ٹالرنس پالیسی پر عمل کرتے ہوئے مزید کارروائیاں جاری رکھی جائیں گی۔
