سندھ حکومت نے نوجوانوں کو ڈیجیٹل مہارتوں سے آراستہ کرنے کے لیے گوگل اور ٹیچ ویلی کے اشتراک سے 30,000 گوگل کیریئر سرٹیفکیٹ اسکالرشپس کا آغاز کر دیا ہے۔ اس پروگرام کے تحت سندھ بھر کی 30 یونیورسٹیوں کے طلبہ کو جدید ڈیجیٹل کورسز کی مفت تربیت فراہم کی جائے گی۔
کراچی رمضان المبارک میں ڈسٹرکٹ ایسٹ میں جرائم کی شرح میں نمایاں کمی، سی پی ایل سی رپورٹ
وزیر اعلیٰ سندھ مراد علی شاہ نے وزیر اعلیٰ ہاؤس میں منعقدہ ایک تقریب میں اس اسکالرشپ پروگرام کا باضابطہ افتتاح کرتے ہوئے کہا:
"یہ اسکالرشپ پروگرام ہمارے طلبہ کے مستقبل میں ایک سرمایہ کاری ہے۔ ہم انہیں عالمی سطح پر تسلیم شدہ ڈیجیٹل سرٹیفکیٹس فراہم کر کے بین الاقوامی ٹیک انڈسٹری میں اعلیٰ تنخواہ والی ملازمتوں کے مواقع فراہم کر رہے ہیں۔”
گوگل کیریئر سرٹیفکیٹ کورسز انڈسٹری کے ماہرین کے ذریعے تیار کیے گئے ہیں، اور طلبہ انہیں تین سے چھ ماہ میں آن لائن مکمل کر سکتے ہیں۔ ان کورسز میں آئی ٹی سپورٹ، ڈیٹا اینالیٹکس، پروجیکٹ مینجمنٹ، یو ایکس ڈیزائن اور سائبر سیکیورٹی جیسے جدید شعبے شامل ہیں۔
پروگرام کی نمایاں خصوصیات:
سندھ کی 30 یونیورسٹیوں کے 30,000 طلبہ کو اسکالرشپس دی جائیں گی۔
فارغ التحصیل طلبہ بین الاقوامی مارکیٹ میں ماہانہ 70,000 سے 16 لاکھ روپے تک کما سکتے ہیں۔
خواتین اور پسماندہ طبقے کے طلبہ کے لیے خصوصی کوٹہ مختص کیا گیا ہے۔
یہ پروگرام سندھ حکومت کے ڈیجیٹل ٹرانسفارمیشن اور نوجوانوں کو بااختیار بنانے کے وڑن سے مطابقت رکھتا ہے۔
سندھ حکومت کی ترجمان، سیدہ تحسین عابدی نے کہا:
"سندھ حکومت سب کے لیے مساوی مواقع فراہم کرنے کے لیے پرعزم ہے۔ یہ اقدام ہمارے نوجوانوں، خاص طور پر خواتین اور پسماندہ طلبہ کو جدید ڈیجیٹل مہارتیں سیکھنے اور عالمی معیشت میں مسابقت کے قابل بنانے میں مدد دے گا۔ یہ سندھ کو پاکستان کا ڈیجیٹل اسکلز حب بنانے کی جانب ایک اہم قدم ہے۔”