نارووال میں مختلف شاہراہوں کی تعمیر کے منصوبوں کی افتتاحی تقریب سے خطاب کرتے ہوئے وزیراعلیٰ پنجاب مریم نواز نے مسلم لیگ (ن) کی حکومت کی کارکردگی پر اظہارِ اطمینان کیا۔
صوبائی وزیروں اور تاجر برادری کے اجلاس میں اہم فیصلے، گیس اور بجلی کے مسائل پر گفتگو
انہوں نے کہا کہ مسلم لیگ (ن) کے قائد نواز شریف نے 12 ماہ میں پاکستان کو مشکلات سے نکال دیا ہے اور ملک کو ترقی کی راہ پر گامزن کر دیا ہے۔ مریم نواز نے کہا کہ وہ عوام کے سامنے اپنی کارکردگی کے ساتھ کھڑی ہیں اور اس کے لیے پانچ سال انتظار نہیں کریں گی۔
وزیراعلیٰ پنجاب نے عوام سے سوال کیا: "کیا مریم نواز کی کارکردگی سے خوش ہو؟” انہوں نے مزید کہا کہ ہر جگہ سے اچھی خبریں آ رہی ہیں، اور پنجاب کے عوام کی خدمت کے لیے دن رات کام کیا جا رہا ہے۔
مریم نواز نے اپوزیشن پر تنقید کرتے ہوئے کہا کہ "بری خبریں صرف اڈیالہ جیل سے آ رہی ہیں، جہاں سے خط آ رہے ہیں کہ خدا کا واسطہ ہے، مجھے نکالو۔” انہوں نے کہا کہ پی ٹی آئی حکومت نے ملک کو دیوالیہ ہونے کے دہانے پر پہنچایا اور ان کے دور میں دہشت گردی بھی واپس آئی۔
انہوں نے کہا کہ مخالفین چاہتے تھے کہ مسلم لیگ (ن) حکومت میں آئے اور معیشت سنبھال نہ سکے، لیکن ان کی امیدیں پوری نہیں ہوئیں۔
مریم نواز نے کسانوں کے لیے حکومتی اقدامات کا ذکر کرتے ہوئے کہا کہ "ہم نے مڈل مین کو نکال کر کسانوں کو براہِ راست قرضے دیے، اور اب تک 10 ہزار ٹریکٹر فراہم کیے جا چکے ہیں۔” انہوں نے مزید کہا کہ کسانوں کے لیے جدید مشینری بھی لائی جا رہی ہے۔
وزیراعلیٰ پنجاب نے اس عزم کا اظہار کیا کہ حکومت عوامی خدمت جاری رکھے گی اور ترقیاتی منصوبوں کو مکمل کرے گی تاکہ صوبے کی معیشت مزید مستحکم ہو۔