برطانوی اخبار دی گارڈین کی رپورٹ کے مطابق، ایک نئے حکم نامے سے امریکا میں داخلے کے اہل 1600 سے زائد افغانوں پر پابندی عائد کر دی گئی ہے۔ وکلا کا کہنا ہے کہ یہ افراد افغانستان اور پاکستان میں محفوظ راستے کے انتظار میں ہیں تاکہ امریکا میں آباد ہو سکیں۔
سعودی ولی عہد اور ٹرمپ کی گفتگو، سرمایہ کاری اور اقتصادی تعاون پر تبادلہ خیال
پناہ گزینوں کی بازآبادکاری کے کارکنوں اور ایک امریکی عہدیدار نے بتایا کہ اس فیصلے سے متاثر ہونے والے افراد میں فعال سروس اہلکاروں کے اہل خانہ اور بچے شامل ہیں، جو پہلے سے ہی امریکا میں موجود اپنے رشتہ داروں سے ملنے کے منتظر ہیں۔
افغان اتحادیوں کی حفاظت پر خدشات:
سابق فوجیوں اور وکالت گروپ ’افغان ایویک‘ نے اس حکم نامے کو شدید تنقید کا نشانہ بناتے ہوئے کہا کہ یہ فیصلہ دنیا کو ایک خطرناک پیغام دیتا ہے کہ امریکی وعدے مشروط اور عارضی ہیں۔ گروپ کے مطابق، یہ اقدام امریکا کی قیادت پر عالمی اعتماد کو نقصان پہنچا رہا ہے اور مستقبل کے اتحادوں کو خطرے میں ڈال سکتا ہے۔
طالبان کی جوابی کارروائیاں:
ایک افغان امریکی فوجی نے تشویش کا اظہار کرتے ہوئے کہا کہ کابل میں موجود اس کی بہن کو طالبان کے ہاتھوں جبری شادی کا سامنا ہو سکتا ہے۔ اس نے مزید کہا کہ طالبان کی جانب سے جوابی کارروائی کا خطرہ لاحق ہے کیونکہ متاثرہ افراد نے امریکی حمایت یافتہ حکومت کے لیے خدمات انجام دی تھیں۔
اقوام متحدہ کی رپورٹ:
اقوام متحدہ کے مشن کے مطابق، طالبان نے سابق امریکی حمایت یافتہ حکومت کے عہدیداروں اور فوجیوں کے خلاف قتل، تشدد اور حراست کے واقعات انجام دیے ہیں۔ رپورٹ میں بتایا گیا ہے کہ جولائی سے ستمبر 2024 کے دوران کم از کم 24 من مانی گرفتاریوں، تشدد کے 10 واقعات اور 5 سابق فوجیوں کے قتل کے کیسز سامنے آئے۔
طالبان کا مؤقف:
طالبان نے سابق حکومت کے عہدیداروں کے لیے عام معافی کا اعلان کیا تھا اور کسی بھی انتقامی کارروائی کے الزامات کی تردید کی ہے۔ تاہم، اقوام متحدہ کی رپورٹس کے مطابق طالبان جنگجوؤں کی جانب سے جبری شادیوں اور دیگر زیادتیوں کے الزامات برقرار ہیں۔
افغان پناہ گزینوں کا مستقبل:
سابق افغان امریکی فوجیوں کا کہنا ہے کہ نئی امریکی پالیسی ان افراد کے لیے سخت نقصان دہ ہے جنہوں نے اپنی جانیں خطرے میں ڈال کر امریکا کے لیے خدمات انجام دیں۔