تشکر نیوز: پاک بحریہ کے ریئر ایڈمرل محمد سلیم کو وائس ایڈمرل کے عہدے پر ترقی دے دی گئی ہے۔ وائس ایڈمرل محمد سلیم نے 1991 میں پاکستان نیوی کی آپریشنز برانچ میں کمیشن حاصل کیا تھا۔ انہوں نے پاکستان نیوی وار کالج لاہور اور نیشنل ڈیفنس یونیورسٹی اسلام آباد سے تعلیم حاصل کی اور پبلک پالیسی میں ایم فل کیا۔ مزید برآں، انہوں نے برطانیہ سے انٹرنیشنل الیکٹرانک وارفیئر مینیجر کا کورس بھی مکمل کیا ہے۔
اپنے شاندار کیریئر کے دوران، وائس ایڈمرل محمد سلیم نے مختلف کمانڈ اور اسٹاف عہدوں پر خدمات انجام دیں، جن میں کمانڈنگ افسر پی این سب میرینز "حمزہ” اور "حرمت”، کمانڈر نویں آگزیلری اور مائن ہنٹنگ اسکواڈرن، اور کمانڈر کراچی شامل ہیں۔
انہوں نے نیول ہیڈکوارٹرز اسلام آباد میں ڈائریکٹر نیول آپریشنل پلانز، ڈپٹی چیف آف نیول اسٹاف (پرسنیل)، اور ڈائریکٹر جنرل نیشنل انٹیلی جنس اکیڈمی جیسے اہم عہدوں پر بھی خدمات انجام دیں۔ وائس ایڈمرل محمد سلیم نیشنل ڈیفنس یونیورسٹی میں ڈائریکٹنگ اسٹاف اور بھارت میں پاکستان کے نیول اتاشی کے طور پر بھی تعینات رہے۔
اس وقت وہ نیول ہیڈکوارٹرز اسلام آباد میں ڈپٹی چیف آف نیول اسٹاف (ٹریننگ اینڈ پرسنیل) کے طور پر فرائض سرانجام دے رہے ہیں۔ ان کی شاندار خدمات کے اعتراف میں انہیں ہلال امتیاز (ملٹری) سے نوازا جا چکا ہے۔