کراچی: جناح انٹرنیشنل ایئرپورٹ کے بین الاقوامی روانگی لاؤنج میں پانی کی پائپ لائن پھٹنے کے باعث پانی کا اخراج ہوا، جس سے ایمیگریشن کاؤنٹرز کے سامنے پانی جمع ہوگیا۔ اس صورتحال نے مسافروں اور ایئرپورٹ کے عملے کو مشکلات سے دوچار کر دیا۔
تیموریہ پولیس کی کامیاب کارروائی، چور سی سی ٹی وی فوٹیج کی مدد سے گرفتار
ایئرپورٹس اتھارٹی کے ترجمان کے مطابق، خراب پائپ کی نشاندہی کے بعد فوری اقدامات کیے گئے اور مغربی حصے کی آئسولیشن والو بند کرکے پانی کا بہاؤ روکا گیا۔ عملے نے بالٹیوں اور وائپرز کی مدد سے پانی نکالنے کی کوشش کی اور اسے دیگر حصوں میں پھیلنے سے روک دیا۔
ترجمان نے مزید وضاحت کی کہ ایئرپورٹ کی معمول کی سرگرمیاں متاثر نہیں ہوئیں اور مسافروں کی نقل و حرکت میں کسی قسم کی رکاوٹ پیش نہیں آئی۔ موقع پر موجود ٹیکنیکل ٹیم نے فوری طور پر مرمت کا کام مکمل کیا۔
ڈومیسٹک آمد لاؤنج میں چھت سے ٹپکنے والے پانی کو بھی مسلسل صاف کیا گیا، تاکہ مسافروں کو کسی پریشانی کا سامنا نہ ہو۔ ایئرپورٹس اتھارٹی نے اس غیر معمولی صورتحال کے دوران تعاون کرنے پر مسافروں کا شکریہ ادا کیا اور یقین دلایا کہ مستقبل میں ایسی صورتحال سے بچنے کے لیے مزید حفاظتی اقدامات کیے جائیں گے۔