تشکر نیوز: کراچی کے علاقے گلستان جوہر بلاک 17 میں پولیس نے اسکول پر قبضے کی کوشش ناکام بناتے ہوئے دو خواتین سمیت 10 افراد کو گرفتار کرلیا۔ پولیس کے مطابق اسکول میں 300 سے زائد طلباء زیر تعلیم ہیں۔
پاکستان اور ترکیہ ایک قوم کے طور پر جڑے ہوئے ہیں: قونصلیٹ جنرل جمال سانگو
پولیس نے واقعے کا مقدمہ اسکول کے سیکیورٹی سپروائزر محمد علی کی مدعیت میں درج کیا۔ ایف آئی آر کے مطابق سیکیورٹی سپروائزر نے بتایا کہ اسکول کے مالک محمد شعیب عمرے کی ادائیگی کے لیے گئے ہوئے ہیں، اور انہیں اسکول کے سیکیورٹی گارڈ نے فون کرکے اطلاع دی کہ 10 سے زائد مرد اور خواتین بہانے سے اسکول کی عمارت میں داخل ہو گئے ہیں۔
گرفتار ہونے والوں نے اسکول کے سیکیورٹی گارڈز سے اسلحہ بھی چھین لیا تھا۔ سیکیورٹی سپروائزر نے فوری طور پر شاہراہ فیصل تھانے جاکر پولیس کو اطلاع دی۔ پولیس نے چھاپا مار کر اسکول سے دو خواتین سمیت 10 افراد کو گرفتار کرلیا۔
ایف آئی آر کے متن میں دعویٰ کیا گیا ہے کہ اسکول کے آفس میں رکھی 6 لاکھ روپے سے زیادہ کی رقم غائب ہے، اور اسکول سے لیپ ٹاپ، اے سی اور دیگر سامان بھی چوری ہو گیا ہے۔ گرفتار افراد نے بتایا کہ انہوں نے یہ سب اسکول کی عمارت کے مالک کے کہنے پر کیا۔
