کراچی: کورنگی سعودآباد پولیس نے شہر بھر میں ڈکیتیوں اور اسٹریٹ کرائم میں ملوث ایک خطرناک اور مطلوب ڈکیت گروہ کو گرفتار کرلیا ہے۔ ایس ایس پی کورنگی توحید رحمان نے بتایا کہ اس گروہ نے کراچی کی سڑکوں پر 100 سے زائد وارداتوں کا اعتراف کیا ہے، جن میں لوٹ مار، راہزنی اور ڈکیتی شامل ہیں۔
شیر شاہ میں نامعلوم افراد کی فائرنگ سے ٹریفک پولیس اہلکار شہید
پولیس نے ملزمان کے قبضے سے دو پستول، گولیاں، چھینے ہوئے موبائل فون اور ایک 125 موٹر سائیکل برآمد کی ہے، جو وارداتوں میں استعمال ہوتی تھیں۔ ملزمان شہریوں سے اسلحے کے زور پر قیمتی موبائل فون اور موٹر سائیکلیں چھینتے تھے، جنہیں بعد میں آن لائن ایپلیکیشنز کے ذریعے سستے داموں فروخت کردیا جاتا تھا۔
توحید رحمان نے مزید بتایا کہ چھینی ہوئی موٹر سائیکلوں کے پارٹس حب وندر کے علاقے میں فروخت کیے جاتے تھے، جبکہ گرفتار ملزمان سے برآمد ہونے والی موٹر سائیکل سعیدآباد کے علاقے سے چھینی گئی تھی۔
پولیس کا کہنا ہے کہ ملزمان کے دیگر ساتھیوں کی گرفتاری کے لیے مختلف علاقوں میں چھاپے مارے جا رہے ہیں، اور ان پر کراچی کے مختلف تھانوں میں مقدمات درج ہیں، جن میں سائٹ سپر ہائی وے، کلاکوٹ، سائٹ اے، جمشید کوارٹر، سعیدآباد، اور بلدیہ کے تھانے شامل ہیں۔