ایران امریکا تعلقات مسعود پزشکیان نے معاہدے کی پاسداری پر فوری مثبت جواب کی پیشکش کردی

ایران امریکا تعلقات کے حوالے سے ایرانی صدر مسعود پزشکیان نے کہا ہے کہ امریکی وعدوں کی تکمیل کی صورت میں تہران فوری طور پر مثبت جواب دے گا۔

رائٹرز نے ایرانی خبر ایجنسی ایسنا کے حوالے سے بتایا کہ مسعود پزشکیان نے یہ بات بشکیک میں شنگھائی تعاون تنظیم کے سربراہی اجلاس سے خطاب کرتے ہوئے کہی۔

ایرانی صدر کے مطابق ایران اور امریکا کے درمیان اسلام آباد مفاہمتی یادداشت طے ہوئی تھی۔ ان کا کہنا تھا کہ اس دستاویز پر امریکی صدر کے دستخط بھی موجود تھے۔ تاہم، واشنگٹن کی اس معاہدے سے وابستگی دو ہفتوں سے بھی کم عرصے تک برقرار رہی۔

مسعود پزشکیان نے وزیراعظم شہباز شریف سے ملاقات کا بھی ذکر کیا۔ انہوں نے کہا کہ شہباز شریف نے انہیں یقین دلایا کہ مکہ معاہدہ دفاعی نوعیت رکھتا ہے اور کسی ملک کے خلاف نہیں ہے۔

ایرانی صدر کے مطابق اس معاہدے کا مقصد خطے میں امن اور سلامتی کو یقینی بنانا ہے۔ انہوں نے ثالثی کی کوششوں میں پاکستان کے کردار کو بھی سراہا۔

مسعود پزشکیان نے کہا کہ مسلم ممالک متحد ہوں تو اسرائیل کے لیے حملہ کرنا آسان نہیں ہوگا۔ ان کے مطابق مسلم ممالک باہمی مذاکرات اور تعاون کے ذریعے اپنے مسائل حل کرنے کی صلاحیت رکھتے ہیں۔

انہوں نے پاکستان، سعودی عرب اور ترکیے کے درمیان ہونے والے معاہدے کو بھی اہم قرار دیا۔ ایرانی صدر نے کہا کہ یہ معاہدہ مسلم دنیا میں اتحاد مضبوط کرنے کی جانب ایک قدم ہے۔

مسعود پزشکیان نے مزید کہا کہ دیگر علاقائی اور مسلم ممالک بھی اس تعاون میں شامل ہو سکتے ہیں۔ ان کے مطابق مشترکہ کوششوں سے مختلف شعبوں میں تعاون کو مزید فروغ دیا جا سکتا ہے۔