کراچی (نامہ نگار): ضلع وسطی میں انسداد پولیو مہم کا آغاز آج 9 ستمبر 2024 کو گورنمنٹ چلڈرن ہسپتال شادمان، نارتھ ناظم آباد ٹاؤن سے ہوا۔ ڈپٹی کمشنر ضلع وسطی طحہ سلیم نے پانچ سال سے کم عمر بچوں کو پولیو سے بچاؤ کے قطرے پلا کر مہم کا باضابطہ افتتاح کیا۔ اس موقع پر گورنمنٹ چلڈرن ہسپتال کے ایم ایس، اسسٹنٹ کمشنر نارتھ ناظم آباد حمیر احمد، ہیلتھ آفیسر ڈاکٹر سہیل میمن، ڈبلیو ایچ او کے ایریا کوآرڈینیٹر ڈاکٹر ایاز شیخ، این اسٹاف آفیسر ڈاکٹر زین العابدین بھائیو، سیکیورٹی فوکل پرسن فضل اکبر اور دیگر اہم شخصیات موجود تھیں۔
ڈپٹی کمشنر طحہ سلیم نے والدین سے اپیل کی کہ وہ اپنے بچوں کو پولیو کے قطرے پلانے میں کوتاہی نہ کریں تاکہ انہیں عمر بھر کی معذوری سے بچایا جا سکے۔ انہوں نے مزید کہا کہ پولیو ورکرز گھر گھر جا کر قطرے پلانے کا کام کر رہے ہیں اور اگر کسی علاقے میں ٹیم نہ پہنچے تو انتظامیہ کو فوراً اطلاع دی جائے۔
پولیو مہم 9 ستمبر سے 15 ستمبر تک جاری رہے گی، جس میں 1717 پولیو ورکرز حصہ لے رہے ہیں۔ ضلع وسطی میں اس مہم کے دوران تقریباً 3 لاکھ 85 ہزار بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ دیگر مقررین نے بھی پولیو کے سنگین نتائج پر روشنی ڈالی اور عوام کو آگاہی فراہم کی۔