خیبرپختونخوا کی مختلف جامعات کے طلبا و طالبات نے ملٹری کالج آف انجینئرنگ رسالپور کا دورہ کیا، جہاں انہیں پاک فوج کی کور آف انجینئرز اور ملٹری کالج آف انجینئرنگ کی تاریخ اور کردار کے حوالے سے تفصیلی بریفنگ دی گئی۔
دورے کے دوران طلبا و طالبات نے کالج کے مختلف شعبوں کے ساتھ ساتھ ریسرچ اینڈ آئی ٹی پارک کا بھی معائنہ کیا۔ اس موقع پر پاک فوج کی کور آف انجینئرز نے آئی ای ڈی کو ناکارہ بنانے، نقل و حرکت کی تکنیکوں، اور ڈیزاسٹر مینجمنٹ میں فوج کے کردار کا عملی مظاہرہ پیش کیا۔
ملٹری کالج آف انجینئرنگ، جو 1948ء میں سیالکوٹ میں قائم ہوا اور 1952ء میں رسالپور منتقل ہوا، نہ صرف فوجی افسران بلکہ بڑی تعداد میں سولین انڈر گریجویٹ اور پوسٹ گریجویٹ طلبا کو بھی معیاری تعلیم و تربیت فراہم کرنے والی ایک ممتاز تعلیمی ادارہ ہے۔
طلبا و طالبات نے کور آف انجینئرز کی بے مثال خدمات کو سراہتے ہوئے ان کے جذبے کو زبردست خراج تحسین پیش کیا۔