تشکر نیوز: پاکستان کا 77 واں یوم آزادی ملک بھر میں ملی جوش و جذبے سے منایا جا رہا ہے۔ شہری جھنڈے اٹھائے سڑکوں پر نکل آئے اور پاکستان زندہ باد کے نعرے لگا رہے ہیں۔ اسلام آباد، کراچی، لاہور اور دیگر شہروں میں یوم آزادی کی تقریبات بھرپور انداز میں جاری ہیں۔ سینٹرل بزنس ڈسٹرکٹ میں شاندار آتشبازی کا مظاہرہ کیا گیا، جس سے شہریوں کی بڑی تعداد لطف اندوز ہوئی۔
یوم آزادی: قوم کو مبارکباد اور دفاع وطن کی مضبوطی کا عہد : جنرل عاصم منیر
یوم آزادی کی تقریبات کا آغاز وطن عزیز کی ترقی اور خوشحالی کے لیے خصوصی دعاؤں سے ہوگا۔ وفاقی دارالحکومت میں 31 اور صوبائی دارالحکومتوں میں 21 توپوں کی سلامی دی جائے گی۔ مرکزی پرچم کشائی کی تقریب اسلام آباد میں ہوگی، جہاں وزیر اعظم شہباز شریف اور پاکستانی ایتھلیٹ ارشد ندیم قومی پرچم لہرائیں گے۔ اسی طرح صوبائی دارالحکومتوں میں بھی پرچم کشائی کی تقاریب ہوں گی۔
ملک بھر میں ریلیاں اور تقاریب منعقد کی جائیں گی، جن میں عوام بھرپور شرکت کریں گے۔
ملٹری اکیڈمی کاکول میں پروقار آزادی پریڈ
پاکستان ملٹری اکیڈمی کاکول میں جشن آزادی کے موقع پر پروقار آزادی پریڈ کا انعقاد کیا گیا، جس میں آرمی چیف جنرل عاصم منیر مہمان خصوصی تھے۔ تقریب کا آغاز تلاوت قرآن پاک سے ہوا، جس کے بعد قائد اعظم محمد علی جناح کی تقریر سنائی گئی۔ لیزر ٹیکنالوجی کا استعمال کرتے ہوئے قیام پاکستان کے مناظر دکھائے گئے۔
پریڈ میں مادر وطن کے شہداء کو خصوصی خراج عقیدت پیش کیا گیا۔ پاکستان ملٹری اکیڈمی کاکول کے کیڈٹس نے مخصوص انداز میں ڈرل پریڈ کا شاندار مظاہرہ کیا۔
پاکستان کی ترقی اور جغرافیائی اہمیت
پاکستان ایک طویل اور لازوال جدوجہد کے بعد وجود میں آیا اور آج 24 کروڑ آبادی کا حامل ہے۔ ملک کی 65% آبادی نوجوانوں پر مشتمل ہے، جن کی عمریں 30 سال سے کم ہیں۔
پاکستان جغرافیائی اعتبار سے خطے کا اہم ملک ہے، جس کی سرحدیں بھارت، چین، افغانستان اور ایران سے ملتی ہیں۔ پاکستان کے پاس 1046 کلومیٹر طویل سمندری پٹی ہے، جو عالمی سمندری راستوں تک باآسانی رسائی فراہم کرتی ہے۔
سی پیک اور تاپی جیسے منصوبے پاکستان کی جغرافیائی اہمیت کو مزید بڑھاتے ہیں۔ ملک کا تاریخی و ثقافتی ورثہ بھی دنیا بھر میں اپنی اہمیت رکھتا ہے، جس میں بلند و بالا پہاڑ، صحراء، سمندر، اور تاریخی مقامات شامل ہیں۔
پاکستانی فوج دنیا کی بہترین افواج میں شمار ہوتی ہے اور ملک نے دہشتگردی کے خلاف جنگ میں فرنٹ لائن کا کردار ادا کیا ہے، جس میں ہزاروں جانوں کی قربانی دی جا چکی ہے۔
کھیل کے میدان میں بھی پاکستان نے کرکٹ، ہاکی اور اسکواش جیسے کھیلوں میں کئی نامور کھلاڑی دنیا کو دیے ہیں۔ پاکستان کا مستقبل تابناک ہے، اور ہر پاکستانی اپنی محنت سے ترقی کی منازل طے کرنے کے لیے پرعزم ہے۔