تشکر نیوز: خیبرپختونخوا کے ضلع مردان میں سیکیورٹی فورسز اور محکمہ انسداد دہشت گردی (سی ٹی ڈی) نے مشترکہ آپریشن کے دوران کالعدم تحریک طالبان پاکستان (ٹی ٹی پی) کے 4 دہشت گردوں کو ہلاک کر دیا۔ ڈان نیوز کے مطابق، سیکیورٹی فورسز اور سی ٹی ڈی کو مردان کے تھانہ چورہ کے علاقے میں ٹی ٹی پی کے دہشت گردوں کی موجودگی کی اطلاع ملی تھی۔
اسرائیل نے حماس رہنما اسماعیل ہنیہ کی تعریف کرنے پر گرفتار شیخ عکرمہ صابری کو رہا کر دیا
اطلاع ملنے کے بعد، سیکیورٹی فورسز اور سی ٹی ڈی نے مشترکہ آپریشن کا آغاز کیا، جس کے دوران دہشت گردوں نے سیکیورٹی اہلکاروں پر فائرنگ کی۔ سیکیورٹی فورسز کی جوابی کارروائی میں ٹی ٹی پی کے 4 دہشت گرد ہلاک ہوگئے۔
خیبرپختونخوا میں دہشت گردی کے خلاف جنگ میں 1970 سے اب تک 2 ہزار سے زائد پولیس اہلکار و افسران اپنی جانیں دے چکے ہیں۔ سرکاری دستاویزات کے مطابق، پشاور میں سب سے زیادہ 367 پولیس اہلکار و افسران شہید ہوئے، جبکہ بنوں میں 239، ڈیرہ اسمٰعیل خان میں 234، مردان میں 121، اور سوات میں 104 پولیس اہلکار شہید ہوئے۔
مزید برآں، صوبے بھر میں ایلیٹ فورس کے 111 اہلکار بھی دہشت گردی کی جنگ میں شہید ہوئے، اور قبائلی اضلاع جیسے کرم، تورغر، اور کوہستان میں بھی پولیس اہلکاروں کی شہادتیں ہوئیں۔
پاکستان انسٹی ٹیوٹ فار پیس اسٹڈیز (پی آئی پی ایس) کی جون کی رپورٹ کے مطابق، پاکستان میں دہشت گرد حملوں کی تعداد 27 تھی، جن میں سے 21 خیبرپختونخوا اور 6 بلوچستان میں رپورٹ ہوئے۔ گزشتہ ماہ ان حملوں کی تعداد 36 تھی۔ کالعدم تحریک طالبان پاکستان اور دیگر مقامی طالبان گروپوں نے خیبرپختونخوا میں 21 حملوں کی ذمہ داری قبول کی، جن میں 28 افراد جاں بحق ہوئے، جن میں 19 سیکیورٹی اور قانون نافذ کرنے والے اہلکار شامل تھے۔
رپورٹ کے مطابق، سیکیورٹی فورسز اور انسداد دہشت گردی کے محکموں نے جون میں 5 کارروائیاں کیں، جن میں 17 مبینہ عسکریت پسند ہلاک اور 3 زخمی ہوئے۔ ان کارروائیوں میں 4 خیبرپختونخوا کے اضلاع بنوں اور لکی مروت میں ہوئیں، جبکہ ایک کراچی میں کی گئی۔