تشکر نیوز: کراچی انتظامیہ نے شہر میں نصب غیر قانونی اور غیر محفوظ بل بورڈز کے خلاف فوری کارروائی کا فیصلہ کیا ہے۔ انتظامیہ نے ان بل بورڈز کی نشاندہی کر لی ہے جنہیں فوراً ہٹایا جانا ہے، اور ان کی فہرست ڈپٹی کمشنرز کو فراہم کر دی گئی ہے۔ یہ فیصلہ کمشنر کراچی سید حسن نقوی کی زیر صدارت اجلاس میں کیا گیا، جس میں ڈپٹی کمشنر کیمازی جنید خان اور دیگر ڈپٹی کمشنرز نے ویڈیو لنک کے ذریعے شرکت کی اور اپنے اضلاع میں غیر قانونی بل بورڈز اور ہورڈنگز کے بارے میں بریفنگ دی۔
پاک فوج نے ہیلی کاپٹر مشن کے ذریعے حسن شگری کی لاش سکردو پہنچا دی
اجلاس میں یہ فیصلہ کیا گیا کہ ڈپٹی کمشنرز ترجیحی بنیادوں پر ایس بی سی اے، ٹاؤن ایڈمنسٹریشن، اور دیگر متعلقہ اداروں کے ساتھ مل کر کارروائی کریں گے۔ کمشنر نے کہا کہ بل بورڈز کی وجہ سے حادثات اور حکومت کی پالیسی کی خلاف ورزیوں کو روکنے کے لیے فوری اقدامات ضروری ہیں۔
اسسٹنٹ کمشنر ہیڈکوارٹرز، کمشنر کراچی رابعہ سید نے شہر میں غیر محفوظ اور غیر قانونی بل بورڈز کے سروے کی رپورٹ پیش کی۔ کمشنر نے تمام ڈپٹی کمشنرز کو ہدایت کی ہے کہ وہ غیر قانونی اور غیر محفوظ بل بورڈز ہٹانے کے لیے فوراً کارروائی کریں۔ ضلع جنوبی اور شرقی میں بیس بیس (20-20) بل بورڈز، ڈپٹی کمشنر وسطی میں نو (9) اور کورنگی میں چھ (6) بل بورڈز فوری طور پر ہٹانے کے لیے منتخب کیے گئے ہیں۔
ڈپٹی کمشنرز کو فوری کارروائی کے لیے مطلوب بل بورڈز کی فہرست فراہم کی گئی ہے، اور انہیں کہا گیا ہے کہ وہ اپنے اپنے ضلع میں بل بورڈز ہٹانے کے لیے خصوصی ٹیمیں تشکیل دیں اور فوراً کارروائی شروع کریں۔ بل بورڈز ہٹانے کے لیے قائم خصوصی ٹیم میں سندھ بلڈنگز کنٹرول اتھارٹی اور ٹاؤن ایڈمنسٹریشن کے افسران شامل ہوں گے۔