آرمی چیف و چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان کی معدنی دولت کو کارآمد بنانا اجتماعی قومی مقصد ہے۔
پاکستان منرلز انویسٹمنٹ فورم 2026 کے شرکا سے خطاب کرتے ہوئے انہوں نے مقامی آبادیوں کو معدنی ترقی کا فائدہ پہنچانے پر زور دیا۔
انہوں نے کہا کہ معدنیات سے مالا مال علاقوں کے لوگوں کو اپنی زندگیوں میں ٹھوس بہتری نظر آنی چاہیے۔
معدنی سرمایہ کاری اور سیکیورٹی
فیلڈ مارشل سید عاصم منیر نے کہا کہ پاکستان کو طویل مدتی معدنی سرمایہ کاری کے لیے مسابقتی منزل بنانا چاہتے ہیں۔
ان کے مطابق کان کنی کے پورے ماحولیاتی نظام کی سیکیورٹی یقینی بنانے کے لیے ہر ممکن اقدام کیا جا رہا ہے۔
انہوں نے کہا کہ کانوں، کان کنوں، سرمایہ کاری، صنعتوں اور منصوبوں کو تحفظ فراہم کیا جائے گا۔ اس شعبے سے وابستہ افراد کا تحفظ بھی یقینی بنایا جائے گا۔
خام مال کے بجائے ویلیو ایڈڈ ترقی پر زور
آرمی چیف نے کہا کہ مقصد صرف خام مال برآمد کرنا نہیں ہے۔ پاکستان ریفائننگ اور مینوفیکچرنگ سمیت پوری ویلیو چین تیار کرنا چاہتا ہے۔
انہوں نے کہا کہ ایسی طویل مدتی شراکت داریوں کو فروغ دینا چاہتے ہیں، جو پاکستان اور اس کے شراکت داروں کے لیے پائیدار معاشی قدر پیدا کریں۔
صلاحیت کو پیداوار میں بدلنے کی ضرورت
فیلڈ مارشل سید عاصم منیر نے کہا کہ پاکستان کے عوام محنتی، دلیر اور پرعزم ہیں۔ ان میں خوابوں کو حقیقت میں بدلنے کی بھرپور صلاحیت موجود ہے۔
انہوں نے کہا کہ وسائل مواقع فراہم کرتے ہیں، جبکہ نتائج کے حصول کے لیے عوام طاقت اور عزم کا سرچشمہ ہیں۔
چیف آف ڈیفنس فورسز نے زور دیا کہ ملک کو صلاحیت سے پیداوار کی طرف بڑھنا ہوگا۔ وعدوں کے بجائے عملی اقدامات اور خام برآمدات کے بجائے ویلیو ایڈڈ ترقی پر توجہ دینا ہوگی۔
فیلڈ مارشل سید عاصم منیر نے خطاب کے اختتام پر ’’پاکستان ہمیشہ زندہ باد‘‘ کا نعرہ بھی بلند کیا۔