ایم کیو ایم کا نئے صوبوں کے لیے تحریک چلانے کا اعلان، 29 نومبر کو مارچ کا فیصلہ

متحدہ قومی موومنٹ پاکستان (ایم کیو ایم) نے ملک بھر میں نئے صوبوں کے قیام کے لیے تحریک چلانے کا اعلان کردیا۔ پارٹی نے 29 نومبر کو شارع فیصل کی جانب بڑے قافلے کی صورت میں مارچ کرنے کا فیصلہ کیا ہے۔

ایم کیو ایم پاکستان کے چیئرمین ڈاکٹر خالد مقبول صدیقی نے کہا ہے کہ پاکستان میں نئے صوبوں کی سب سے زیادہ ضرورت سندھ کے شہری علاقوں میں ہے۔ ان کے مطابق ایم کیو ایم اس تحریک کی قیادت کرے گی اور عوامی حقوق کے حصول کے لیے سڑکوں پر نکلے گی۔

انہوں نے ان خیالات کا اظہار پی آئی بی کالونی کے کے ایم سی گراؤنڈ میں جنرل ورکرز اجلاس سے خطاب کرتے ہوئے کیا۔ اجلاس میں کارکنوں کی بڑی تعداد شریک ہوئی۔

29 نومبر کو شارع فیصل کی جانب مارچ

خالد مقبول صدیقی نے کہا کہ جہاں آبادی کے تناسب سے ضرورت ہو، وہاں نئے صوبے قائم کیے جائیں۔ ان کے بقول سندھ کے شہری علاقوں کا نئے صوبوں کے قیام کے لیے سب سے مضبوط مقدمہ ہے۔

انہوں نے کہا کہ جو لوگ پوچھتے ہیں کہ نیا صوبہ کہاں بنے گا، انہیں جواب ہے کہ ہم اپنے حصے کی زمین ساتھ لے کر آئے تھے۔ ان کا کہنا تھا کہ ہندوستان میں اپنی زمینیں پاکستان کے نام پر قربان کی گئیں۔

خالد مقبول صدیقی نے دعویٰ کیا کہ پاکستان میں غیر مسلموں کی چھوڑی ہوئی متروکہ جائیدادیں قانونی طور پر ان کی ہیں۔

انہوں نے اعلان کیا کہ 29 نومبر کو ایم کیو ایم کا قافلہ شارع فیصل کی جانب روانہ ہوگا۔ ان کے مطابق قافلے کے نکلنے پر شارع فیصل جانے والے تمام راستے مسدود ہوجائیں گے۔

انہوں نے کہا کہ پورا پاکستان ایم کیو ایم کی جانب دیکھ رہا ہے اور لوگ تحریک کے ساتھ کھڑے ہونے کا پیغام دے رہے ہیں۔

ماضی کے واقعات کا حوالہ

ایم کیو ایم چیئرمین نے اپنی تقریر میں ماضی کے واقعات کا بھی ذکر کیا۔ انہوں نے 30 ستمبر 1986 کو حیدرآباد میں مہاجروں کے قتل عام، سانحہ سہراب گوٹھ اور سانحہ قصبہ علی گڑھ کا حوالہ دیا۔

ان کا کہنا تھا کہ ان واقعات کے باوجود تحریک آگے بڑھتی رہی۔ انہوں نے کہا کہ ایم کیو ایم کو ایوانوں کی ضرورت نہیں بلکہ ایوانوں کو ان کی ضرورت ہے۔

خالد مقبول صدیقی نے کہا کہ پارٹی عوام کی حکمرانی قائم کرنے اور اقتدار عام شہریوں تک پہنچانے کے لیے جدوجہد کر رہی ہے۔ آئندہ اجتماع میں تحریک سے متعلق مزید فیصلے کیے جائیں گے۔

انہوں نے کہا کہ پی آئی بی گراؤنڈ آج کے اجتماع کے لیے چھوٹا پڑ گیا۔ ان کے مطابق یہ اجتماع ظالموں کے مقابلے میں مظلوموں اور جابروں کے مقابلے میں معصوموں کی صف بندی کے لیے بلایا گیا تھا۔

انہوں نے موروثی سیاست پر تنقید کرتے ہوئے کہا کہ پاکستان میں چند خاندانوں کی حکمرانی ختم ہونی چاہیے۔ شرکا نے نئے صوبوں کے قیام کے مطالبے کی ہاتھ اٹھا کر حمایت بھی کی۔

وسیم اختر: کراچی سے اٹھنے والا نعرہ اسلام آباد تک جائے گا

اجلاس سے ایم کیو ایم کے سینئر رہنما وسیم اختر نے بھی خطاب کیا۔ انہوں نے کہا کہ یہ صرف ضلع شرقی کے کارکنوں کا اجلاس ہے، پورا کراچی ابھی یہاں موجود نہیں۔

وسیم اختر کے مطابق کراچی ایم کیو ایم کے ساتھ جڑ رہا ہے اور یہاں سے اٹھنے والا نعرہ اسلام آباد تک پہنچے گا۔ انہوں نے بلاول بھٹو زرداری کو مخاطب کرتے ہوئے کہا کہ وہ آ کر دیکھیں کہ اجتماع میں صرف ضلع شرقی کے کارکن شریک ہیں۔

فاروق ستار کا انتظامی یونٹس بنانے کا مطالبہ

ایم کیو ایم کے سینئر رہنما فاروق ستار نے کہا کہ ان کی جماعت کا مقدمہ پاکستان کے 26 کروڑ عوام کے حقوق سے متعلق ہے۔ ان کے بقول ملک میں مسلسل ناانصافیاں ہو رہی ہیں۔

فاروق ستار نے 18ویں آئینی ترمیم پر تنقید کرتے ہوئے کہا کہ اس سے پاکستان کی شرح نمو میں اضافہ نہیں ہوا۔ انہوں نے تعلیم، صحت، سڑکوں اور صفائی کی صورت حال پر بھی سوالات اٹھائے۔

ان کا کہنا تھا کہ چار صوبے چند سو خاندانوں کی شراکت داری بن کر رہ گئے ہیں۔ پاکستان کو اندرونی طور پر مضبوط بنانے کے لیے چاروں صوبوں میں انتظامی بنیادوں پر مزید یونٹس قائم کیے جائیں۔

فاروق ستار نے سندھ میں پیپلز پارٹی کی گزشتہ 18 سالہ حکومت پر بھی تنقید کی۔ انہوں نے کہا کہ انتظامی یونٹس زبان یا لسانیت کے بجائے انتظامی بنیادوں پر بننے چاہئیں۔

ان کے مطابق کراچی کے پختون، بلوچ، گلگتی اور بلتی سمیت مختلف برادریوں سے تعلق رکھنے والے شہری الگ انتظامی یونٹ کا مطالبہ کر رہے ہیں۔

انہوں نے واضح کیا کہ انتظامی یونٹس کا مطالبہ سندھ کی ثقافت یا زبان کے خلاف نہیں۔ ان کا کہنا تھا کہ ایسے یونٹس کے قیام کا مقصد عوام کو حقوق اور بنیادی سہولیات فراہم کرنا ہے۔

فاروق ستار نے کہا کہ وڈیروں اور جاگیرداروں نے کراچی کے علاوہ لاڑکانہ، سکھر، میرپورخاص اور حیدرآباد کو بھی کچھ نہیں دیا۔ ان کے بقول انتظامی یونٹس کے مطالبے پر نہیں بلکہ کرپشن اور بدمعاشی پر فل اسٹاپ لگنا چاہیے۔